BELCHER, JOHN (fl. 1721-1763), cynghorwr Methodistaidd

Mab Edmund Belcher, Eglwys Ilan, Sir Forgannwg. Gofaint oeddynt ill dau, ond dechreuodd y mab bregethu gyda'r Methodistiaid. Dewiswyd ef i ymweld â'r brodyr sengl yn sasiwn Watford, 1743, ac ymhen blwyddyn fe'i penodwyd yn gynorthwywr i Howel Harris yn rhai o siroedd y De. Bu cryn amheuaeth yn ei feddwl ynghylch ymlyniad y Methodistiaid wrth Eglwys Loegr, ac yn 1745 arwyddodd, gydag eraill, lythyr i'r sasiwn yn cwyno yn erbyn hynny a bygwth cefnu. Penodwyd ef yn fuan wedyn i ymweld â Gwynedd. Troes ei gefn ar Harris yn yr ymraniad rhyngddo a Daniel Rowland, ac ymunodd a phlaid Rowland.

Croeswyd ef mewn cariad, ac ymunodd yn ei ffrwst â'r fyddin yn 1758, a bu'n ymladd yn America. Bu sôn yng Nghymru iddo farw yn America c. 1761, ond gwyddys ei fod yn Nhrefeca yn Awst 1763. Yr oedd o gynheddfau meddyliol cryfion, ac yn bregethwr cymeradwy iawn.

Awdur

• Y Parchedig Gomer Morgan Roberts, (1904 - 1993)

Ffynonellau

• Dyddiadur W. Thomas, Cardiff Manuscript4, 877
• Methodistiaeth Cymru (1851–6), i, 487; ii, 141; iii, 4, 21-2
• J. Morgan Jones a W. Morgan, Y Tadau Methodistaidd (1895-1897), i, 229-30
• Hanes Eglwysi Annibynnol Cymru, ii, 373-4
• D. E. Jenkins, Calvinistic Methodist Holy Orders (1911), 103-5, 135
• Cylchgrawn Cymdeithas Hanes y Methodistiaid Calfinaidd, xxviii, 39; xxix, 27, 30, 70, 73-4, 134; xxx, 30; xxxi, 52, 95; xxxii, 43

Dolenni Ychwanegol

• Wikidata: Q20733354

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/