BEVAN, LLEWELYN DAVID (1842-1918), gweinidog gyda'r Annibynwyr

Ganwyd 11 Medi 1842 yn Llanelli, mab i Hopkin Bevan ac Eliza (Davies), y tad yn un o Bevaniaid Llangyfelach, teulu Hopkin Bevan, a'r fam yn disgyn o Lewis Rees. Addysgwyd ef yn University College School a'r Coleg Newydd yn Llundain (B.A., LL.B.). O 1865 hyd 1869 bu'n gynorthwywr i'r Dr. Thomas Binney yn y King's Weigh-house, ac o 1869 hyd 1876 yn weinidog Whitefield's Tabernacle, Llundain. Ar ôl tymor o fugeilio (1876-82) yn New York, dychwelodd i ofalu (1882-6) am eglwys Highbury Quadrant; ond symudodd wedyn i Collins Street, Melbourne. Yn Awstralia y bwriodd weddill ei oes - 1886-1910 ym Melbourne, a 1910-8 yn brifathro Coleg Annibynnol Parkin, yn Adelaide. Bu farw 9 Awst 1918. Yr oedd yn briod, a chanddo bump o blant.

PENRY VAUGHAN BEVAN (1876 - 1913),

Pedwerydd mab Llewelyn David Bevan. Bu yn Athro Anianeg yn y Royal Holloway College; am ei yrfa a'i waith, gweler T. Iorwerth Jones yn "The contributions of Welshmen to science" , Transactions of the Honourable Society of Cymmrodorion , 1932-3, 54-6.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Louisa Jane Bevan, The Life and Reminiscences of Llewelyn David Bevan (Melbourne 1920)

Dolenni Ychwanegol

• VIAF: 94633101
• Wikidata: Q6662097

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/