CHAMBERS, WILLIAM (1809 - 1882), ustus

Unig fab William Chambers, Llanelly House, Sir Gaerfyrddin, brodor o Bicknor, Caint, ac uchel siryf sir Gaerfyrddin yn 1828. Priododd, 1835, Joanna Trant, merch Capten Payne o'r llynges. Fel ynad gweithiodd yn galed i ddarostwng gwrthryfel Beca yn 1843 ac i symud y drygau a oedd yn gyfrifol amdano. Cynorthwyodd i ddatblygu diwydiannau ac adnoddau crai tref a phorthladd Llanelli. Yn 1840 sefydlodd y ' South Wales Pottery, ' a dug y gwaith ymlaen hyd 1855 pryd y'i trosglwyddwyd i'r Meistri Coombs a Holland. Yr oedd ei dad wedi etifeddu Llanelly House am ei oes drwy ewyllys Syr John Stepney, a phan fu farw ef ar y 9fed o Chwefror 1855, aeth yr ystad yn ôl i deulu Stepney. Ar farw'r 9fed barwnig, Syr Thomas Stepney yn 1825, y cafodd Chambers 'Llanelly House' - ni wyddys pa fodd. Yn 1853 prynodd stad yr Hafod, Sir Aberteifi, a bu'n byw yno hyd 1871, pryd y gwerthodd Hafod a dychwelyd i Gaint. Yr oedd yn ustus heddwch yn siroedd Caerfyrddin ac Aberteifi ac yn ddirprwy-raglaw sir Aberteifi. Bu farw ddechrau 1882.

Awduron

• Nansi Ceridwen Jones
• Yr Athro Emeritus David Williams, (1900 - 1978)

Ffynonellau

• H. Blackwell, NLW MSS 9251-9277A: A Dictionary of Welsh Biography
• Bye-Gones, relating to Wales and the Border Counties, 1882, 43
• Thomas Nicholas, Annals and Antiquities of the Counties and County Families of Wales (London 1872), cyf.I, 191
• Transactions of the Carmarthenshire Antiquarian Society and Field Club, 1943-4, 21-63
• John Innes, Old Llanelly (Cardiff 1902), 63

Darllen Pellach

• Erthygl Wicipedia: William Chambers

Dolenni Ychwanegol

• Wikidata: Q20734580

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/