CORBETT, JOHN STUART (1845-1921), cyfreithiwr a hynafiaethydd

Ganwyd 16 Mai 1845, mab hynaf John Stuart Corbett ac Elizabeth, merch James Evans, Gortha, sir Faesyfed; daethai'r tad i Gaerdydd yn 1841 yn stiward dros ei berthynas, ail ardalydd Bute. Cafodd ei addysg yn Cheltenham. Pasiodd yn gyfreithiwr yn 1867, a bu'n gweithredu fel y cyfryw yng Nghaerdydd gyda phartner; bu'n glerc i fainc ynadon Llandaf am gyfnod. Priododd (1872) Blanche, merch James Williams Evans, ficer Costessey gerllaw Norwich, mab un a fuasai'n rheithor Llandochau, gerllaw Caerdydd. Pan fu farw ei frawd James Andrew Corbett yn 1890, fe'i dewiswyd ef yn gyfreithiwr i ystad ardalydd Bute - swydd a gadwodd hyd nes y rhoes heibio weithio yn 1917. Bu yn y swydd bwysig hon ar adeg pan oedd llwyddiant meysydd glo De Cymru ar ei uchaf ac yn ystod 'rhyfel y rheilffyrdd,' pryd yr oedd ystadau teulu Bute o dan ofal y gŵr mawr a dylanwadol hwnnw - William Thomas Lewis, y barwn Merthyr 1af.

Arlunio a garddio oedd ei brif ddiddordebau, eithr wedi'r flwyddyn 1890 rhoes lawer o'i seibiant i hanes, yn arbennig hanes arglwyddiaeth Morgannwg; y mae'r haneswyr a'i dilynodd yn yr un maes yn cydnabod ei ofal a'i gywirdeb. Bu farw 9 Mawrth 1921.

JAMES ANDREW CORBETT (1846 - 1890), cyfreithiwr

Ei frawd, a olygodd argraffiad cywir o gyfrol Rice Merrick, A Booke of Glamorganshire Antiquities, yn 1887.

Awdur

• Henry John Randall, (1877 - 1964)

Ffynonellau

• Cardiff Records (1898–1911)
• J. S. Corbett, Glamorgan Papers and Notes on the Lordship and its members (1925)

Dolenni Ychwanegol

• Wikidata: Q20733659

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/