DAFYDD DARON (fl. 1400), deon Bangor

yn niwedd teyrnasiad Rhisiart II. Ym mis Tachwedd 1397 cafodd brebendiaeth Llandwrog. Ynghyd â'r cabidwl rhoes gyfrif, 19 Mai 1399, o werthoedd ariannol yr esgobaeth a fuasai yn eu gofal hwy er pan fu'r esgob Swaffham farw 24 Mehefin 1398. Ar un adeg yr oedd ganddo swydd yn eglwys Clynnog Fawr. Dyna'r cwbl a ddywed hanes cyfoes amdano.

Dywed Browne Willis (gan ddilyn Le Neve) iddo gael ei fwrw allan o'i wlad oherwydd iddo gynorthwyo Owain Glyn Dŵr; dywed hefyd fod y deon yn ŵr o gyfoeth ac yn fab i Evan ap Dafydd ap Griffith, yn disgyn o Garadoc ap Iestyn. Y mae'r honiad mai yn ei dŷ ef yr arwyddwyd y ' Cytundeb Tridarn ' yn fwy amheus. Yn ôl Hall, croniclydd o Sais, a'r unig awdurdod sy'n dywedyd ymhle'r arwyddwyd y ddogfen honno, yn nhŷ archddiacon Bangor yr arwyddwyd hi, ac felly ni ellir cysylltu Dafydd Daron â'r hanes ond trwy farnu bod y gair ' archddiacon ' wedi ei arfer ar gam am ' deon.'

Awdur

• Syr John Edward Lloyd, (1861 - 1947)

Ffynonellau

• J. E. Lloyd, Owen Glendower / Owen Glyn Dwr (1931), 1931, 94
• Browne Willis, A survey of the cathedral church of Bangor; and the edifices belonging to it … (1721) (arg. 1721), 122-3
• An Inventory of the Early Chancery Proceedings concerning Wales (1937) (Cardiff, 1937), 15

Dolenni Ychwanegol

• Wikidata: Q20732739

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/