DAFYDD, ROBERT (1747 - 1834), 'Robert Dafydd, Brynengan,' pregethwr gyda'r Methodistiaid Calfinaidd, a gwehydd

Ganwyd yng Nghwmbychan, Nanmor, yn fab i Ddafydd Prichard, gwehydd. Tua'r 21 oed argyhoeddwyd ef dan bregeth Siôn Robert Lewis yr almanaciwr, ac aeth i'r ysgol gylchynnol a gedwid gan Robert Jones (Rhoslan) ym Meddgelert. Symudodd i weithio ym mhlwyf Llangybi; priododd, ac aeth i fyw yn Nhyddyn Ruffydd. Yr oedd yn un o dystion gweithred gyntaf (1772) capel Brynengan, canolfan Methodistiaeth Eifionydd, a dechreuodd bregethu yn 1773. Bu farw 17 Ebrill 1834 yn nhŷ-capel Brynengan, lle'r oedd un o'i feibion yn byw. Yr oedd yn gawr o ddyn o ran ei gorff, ac yn hynod iawn am blaendra a gerwindeb ei ddywediadau.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Henry Hughes, Robert Dafydd, Brynengan; ei hanes, a'i hynodion, ynghyda hanes eglwys hynafol ac enwog Brynengan, gyda darluniau o'r gwrthrych ac o gafel Brynengan (Caernarfon 1895)

Darllen Pellach

• J. Morgan Jones, W. Morgan, Y Tadau Methodistaidd (1895-1897), ii, tt.68-75

Dolenni Ychwanegol

• Wikidata: Q20734314

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/