DAVIES, Syr DAVID (1792 - 1865), meddyg

Mab Robert Davies, Gorwydd, Llanddewi-brefi, a'i wraig Eleanor, merch John Price, Rhosybedw, Llanwrda. Bedyddiwyd David Davies yn eglwys Llanddewibrefi ar 5 Medi 1792.

Aeth yn gynnar ar ei yrfa i Lundain a cheir ef yn feddyg yn Hampton, Middlesex, yn cynorthwyo un o feddygon y frenhines Adelaide; yn ddiweddarach daeth ef ei hunan yn feddyg i'r brenin William IV ac Adelaide. Fe'i gwnaethpwyd yn farchog gan y frenhines Victoria yn gynnar ar ôl iddi esgyn yr orsedd.

Priododd, 8fed o Chwefror 1819, Letitia Maria, merch John Williams ('Yr Hen Syr'), ysgolfeistr ysgol Ystrad Meurig. Bu iddynt bedwar mab - (a) Samuel Price, (b) Syr Robert Henry, (c) Thomas, a (d) William. Bu'r meddyg farw yn Lucca yn yr Eidal, 2 Mai 1865, a chladdwyd ef yn Biarritz.

Awdur

• Syr William Llewelyn Davies, (1887 - 1952)

Ffynonellau

• F. Jones, 'Two illustrious sons of Cardiganshire, Transactions and archaeological record of the Cardiganshire Antiquarian Society, xiii, 74-80
• llythyrau Syr David Davies (heb eu catalogio) yng nhasgliad "Alderman J E Rogers-Lewis, J.P., Abermeurig, Lampeter", yn Ll.G.C
• NLW MS 11763E: Letters, 1827-1848

Dolenni Ychwanegol

• Wikidata: Q20732901

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/