DAVIES, JOHN (1868 - 1940), awdur

Ganwyd ym Metws-yn-Rhos, 23 Hydref 1868; yr oedd yn gefnder i John Evans, Eglwysbach. Addysgwyd ef yn y Liverpool Institute, a bu am flynyddoedd lawer yn glerc yng ngwasanaeth y Great Western Railway, yng Nghasnewydd, Caerdydd, a Bridgwater; yng Nghaerdydd y bu fyw wedi ymddeol, ac yno y bu farw 15 Mawrth 1940; claddwyd ef yn Llanishen. Ar hyd ei fywyd, bu'n ddarllenwr gwancus ac yn brynwr mawr ar lyfrau; sgrifennai hefyd, yn dda, i'r Eurgrawn, y Drysorfa, a chyfnodolion eraill. Enillodd wobrau am draethodau yn eisteddfodau cenedlaethol 1930, 1931, a 1939. Yr oedd yn wladgarwr brwd, ac un o ffrwythau ei alltudiaeth yn Bridgwater fu ymddiddori yn hanes Cymro arall a fu'n byw yno, sef Moses Williams. Troes y chwilfrydedd hwn ef yn chwilotwr dygn; wedi ymddeol, teithiodd lawer i ddarllen llawysgrifau a chasglu ffeithiau at lyfr helaeth ar fywyd Moses Williams. Cyhoeddwyd Bywyd a Gwaith Moses Williams gan Brifysgol Cymru yn 1937, ond ar raddfa lawer llai nag y bwriadai'r awdur (gweler Archæologia Cambrensis, Mehefin 1938, 152-4).

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Iorwerth C. Peate, Baner ac Amserau Cymru, 27 Mawrth 1940
• adnabyddiaeth bersonol

Dolenni Ychwanegol

• Wikidata: Q20733382

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/