DAVIES (DAVYS), MATTHEW (fl. 1620), gwleidyddwr

mab hynaf Edward Davies, Chisgrove, swydd Wilts (o deulu Syr John Davies, 1569 - 1626, bardd a chyfreithiwr y mae ysgrif arno yn y D.N.B.). Dewiswyd ef yn aelod dros Gaerdydd yn Senedd gyntaf Iago I, o dan nawdd y 3ydd iarll Penfro, a bu'n ymladd yn gryf dros iawnderau'r fwrdeisdref honno yn erbyn y cynnig i newid cwrs trafnidiaeth drwy bontio afon Gwy yng Nghasgwent. Ac yntau eto'n fyfyriwr yn y Middle Temple (fe'i derbyniwyd 4 Ebrill 1614), bu'n siarad yn aml yn yr ' Addled Parliament ' (1614), gan arwain, gyda'i fynych areithiau gwladgarol, y gwrthwynebiad i gymal 119 yn Neddf yr Uno a gweithredu fel cadeirydd y pwyllgor a fu'n ystyried y mesur a gyflwynwyd (cyn ei amser, fel petai) i'w ddiddymu; bu hefyd yn pleidio mesurau'n ymwneud â chadwraeth y Saboth a'r ymosod ar ddrwg-weithredoedd etholiadol Syr Thomas Parry pan oedd hwnnw'n siansler y Duchy of Lancaster. Mewn Seneddau diweddarach bu'n eistedd dros etholaethau yn Lloegr - ar y cyntaf yn y mannau hynny yn Wiltshire lle yr oedd teulu Pembroke yn ddylanwadol, eithr peidiodd â chymryd rhan o unrhyw bwys yn y dadleuon. Gan iddo esgeuluso cymryd ei le yn y Senedd Faith fe'i lluddiwyd ('disabled') oherwydd iddo wrthod mynd i'r Senedd pan wysiwyd ef yno (15 Mawrth 1643). Yn Shaftesbury, un o etholaethau 'poced' teulu Pembroke, yr oedd yn byw ar y pryd.

Awdur

• Yr Athro Emeritus Arthur Herbert Dodd, (1891 - 1975)

Ffynonellau

• Trafodion Anrhydeddus Gymdeithas y Cymmrodorion, 1942, 31, 35-6, 70-1
• The Journals of the House of Commons, iii,4
• W. R. Williams, The parliamentary history of the principality of Wales, from the earliest times to the present day, 1541-1895 (Brecknock 1895), 106
• H. A. C. Sturgess, Register of Admissions to the Honourable Society of the Middle Temple (1949), i, 102

Dolenni Ychwanegol

• Wikidata: Q6790387

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/