DAVIES, RICHARD (1635 - 1708), Cloddiau Cochion, Sir Drefaldwyn, Crynwr

Ganwyd yn y Trallwng, Sir Drefaldwyn, yn fab rhieni yr oedd ganddynt ystad fechan. Cafodd beth addysg a'i ddwyn i fyny yn egwyddorion yr Eglwys Wladol. Pan oedd tua 12 neu 13 oed dechreuodd ymlynu wrth yr Annibynwyr, gan gael dylanwadu arno gan Vavasor Powell yn fwyaf arbennig. Yn 1657 troes yn Grynwr, y cyntaf o'r sect honno yn ei ran ef o'r wlad. Cofir amdano heddiw oblegid ei hunangofiant - An account of the convincement, exercises, services and travels of that ancient servant of the Lord Richard Davies… , llyfr sydd yn parhau i gael ei gyhoeddi.

Yr oedd croeso bob amser i Grynwyr yn Cloddiau Cochion, ei gartref, ac er i Davies gael ei garcharu fwy nag unwaith oblegid ei syniadau crefyddol ni surwyd mo'i ysbryd. Trafaeliodd lawer trwy Gymru a Lloegr i bregethu, ar rai adegau gyda John ap John, Charles Lloyd, Dolobran, a'i frawd Thomas Lloyd.

Bu farw 22 Ionawr 1708 a'i gladdu yng nghladdfa'r Crynwyr, Cloddiau Cochion.

Awdur

• Y Parchedig Thomas Mardy Rees, (1871 - 1953)

Ffynonellau

• A. C. Bickley, DAVIES, RICHARD (1635–1708), Oxford Dictionary of National Biography, 1888
• T. M. Rees, A history of the Quakers in Wales and their emigration to North America (1925)
• R. Williams, Montgomeryshire Worthies (1894)

Darllen Pellach

• J. Gwynn Williams, Davies, Richard (bap. 1635, d. 1708), Oxford Dictionary of National Biography, 2004
• William C. Allen, A son of the morning: incidents in the life of Richard Davies (Philadelphia 1894)

Dolenni Ychwanegol

• VIAF: 47153872
• Wikidata: Q18559845

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/