DAVIS (DAVIES), RICHARD (1658 - 1714); gweinidog Annibynnol

Gŵr o Sir Aberteifi, a fu ar y cychwyn yn ysgolfeistr yn Llundain, ond a urddwyd yn 1689 yn weinidog ar eglwys Annibynnol Rothwell (seinier ' Rowel'), Swydd Northampton. Achosodd ei weinidogaeth yno ddadlau mawr ymysg Ymneilltuwyr : (1) cyhuddid ef o bregethu athrawiaethau Antinomaidd; (2) cas gan ei gydweinidogion mwy academaidd eu naws oedd ei ddulliau 'diwygiadol' wrth bregethu, a'r defnydd helaeth a wnâi o bregethwyr teithiol lleyg; (3) bu ei gyndynrwydd ym mhlaid y ffurflywodraeth 'gynulleidfaol,' a'i elyniaeth at y 'classis' Presbyteraidd, yn gryn symbyliad i'r Annibynwyr Seisnig i ymado â'r ' Undeb ' a wnaethpwyd yn 1690 rhwng Presbyteriaid ac Annibynwyr. Un o feirniaid pwysicaf Davis oedd Daniel Williams. Yn 1692, ataliodd y ' Common Fund ' ei chymorth ariannol rhag Davis, h.y. fe'i bwriwyd allan o'r ' Undeb.' Bu farw 10 Medi 1714. [Ar ei feddfaen yn eglwys blwyf Rothwell rhoir dyddiad ei farw yn 11 Medi a'i oed yn 56.] Ei olynydd yn Rothwell oedd Mathias Maurice.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• R. W. Dale, History of English Congregationalism (Llundain 1907), 479-80
• Llawysgrif o eiddo'r Presbyterian Board, a gyhoeddwyd gan Alexander Gordon dan y teitl Freedom after Ejection. A Review (1690–1692) of Presbyterian and Congregational Nonconformity in England and Wales, 1917, 184-7
• D. M. Lewis yn Y Cofiadur, 1925, 31-4
• Transactions of the Congregational Historical Society., ii, 128; vii, 224, ac yn bennaf vi, 389
• Jeremy Owen, Golwg ar y Beiau y sydd yn yr hanes a brintiwyd ynghylch pedair neu bum mlynedd i nawr, ym mherthynas i'r rhwygiad a wnaethbwyd yn Eglwys Henllan … 1707, 1708, 1709 (Caerfyrddin 1732-3) (ailargraffiad Prifysgol Cymru, 1950)

Dolenni Ychwanegol

• VIAF: 18638552
• Wikidata: Q18922208

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/