EDWARDS, JOHN (1799 - 1873?), crydd a cherddor

Ganwyd yn Cwmbranfach, plwyf Llansadwrn, Sir Gaerfyrddin. Ni chafodd fanteision addysg ym more ei oes. Cafodd wersi mewn cerddoriaeth gan Dafydd Siencyn Morgan. Crydd ydoedd wrth ei alwedigaeth, a threuliodd ei oes wrth ei grefft yn Llangadog, Sir Gaerfyrddin. Bu'n arwain y canu yng nghapel y Methodistiaid am flynyddoedd, ac yn glochydd eglwys y plwyf am 10 mlynedd. Cadwai ddosbarth cerddorol bob nos o'r wythnos mewn rhyw bentref neu gilydd, ac yr oedd yn chwaraewr da ar y clarinet. Enillodd wobr Cymdeithas y Cymmrodorion am gyfansoddi tôn. Cyfansoddodd rai anthemau a nifer mawr o donau. Ymddangosodd ei dôn gyntaf, ' Grongar,' yn Seren Gomer 1824, a cheir tonau o'i waith yn yr Haleliwia, Haleliwia Drachefn, Telyn Seion (Rosser Beynon), a Caniadau Seion (R. Mills). Ysgrifennodd adolygiad ar Gramadeg (John Mills) a Caniadau Seion i'r Haul, 1839. Bu farw tua'r flwyddyn 1873, a chladdwyd ef ym mynwent eglwys Llangadog.

Awdur

• Robert David Griffith, (1877 - 1958)

Ffynonellau

• Y Cerddor, Mai 1893
• M. O. Jones, Bywgraffiaeth Cerddorion Cymreig (1890)
• Edward Jones, Rhestr gyda nodiadau byrion, o Enwogion Cymreig o 1700 i 1900 (1908)

Dolenni Ychwanegol

• Wikidata: Q20733398

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/