EVANS, GEORGE EYRE (1857 - 1939), gweinidog Undodaidd a hynafiaethydd

Mab i David Lewis Evans; ganwyd 8 Medi 1857 yn Colyton, swydd Dyfnaint. Bu yn ysgol William Thomas ('Gwilym Marles') ac mewn ysgol yn Lerpwl. Bu am rai blynyddoedd yn weinidog Eglwys y Gwaredwr yn Whitchurch, Sir Amwythig, a rhoes flynyddoedd o'i oes yn ddi-dâl i'r capel Undodaidd yn Aberystwyth. Eithr hanesydd a hynafiaethydd ydoedd yn anad dim. Bu am 18 mlynedd yn swyddog ymchwil i'r comisiwn brenhinol ar 'Ancient Monuments' yng Nghymru a Mynwy, ac yn ysgrifennydd Cymdeithas Hynafiaethol sir Gaerfyrddin am 23 mlynedd. Derbyniodd ' The Silver Wolf ' - yr anrhydedd uchaf ym mudiad y Scouts. Cyhoeddodd nifer o lyfrau Saesneg - History of Renshaw Street Chapel, Liverpool, 1887; Colytonia, 1898; Whitchurch of Long Ago, 1893; Vestiges of Protestant Dissent, 1897; The Midland Churches, 1899; Lampeter, 1905; Cardiganshire, a Personal Survey, 1903; Record of the Provincial Assembly of Lancashire and Cheshire, 1896; Antiquarian Notes, cylchgrawn preifat a gyhoeddodd o 1898 hyd 1905 o leiaf. Yr oedd ganddo hefyd nifer mawr o lyfrau mewn llawysgrif. Bu farw 9 Tachwedd 1939 yn 82 mlwydd oed a gwasgarwyd ei lwch ym mynwent Alltyplaca, Llanwenog.

Awdur

• Y Parchedig Thomas Oswald Williams, (1888 - 1965)

Ffynonellau

• Transactions of the Unitarian Historical Society, vii, 199-203
• Yr Ymofynnydd, 1939
• Archifau LlGC: NLW MS 3188B, NLW MS 3189B, NLW MS 3190C, NLW MSS 4280-4300, 7945-7984, NLW MS 7992D, NLW MS 7993C, NLW MS 7994D

Dolenni Ychwanegol

• Wikidata: Q20733065

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/