FROST, WILLIAM FREDERICK (1846 - 1891), telynor

Ganwyd yn Albert Street, Merthyr Tydfil, 28 Rhagfyr 1846, mab William Frost, telynor dall. Collodd y tad ei olwg trwy ddamwain yn y lofa yn 13 oed, anfonwyd ef i ysgol y deillion yn Abertawe, ac yno y dysgodd ganu'r delyn. Cafodd y mab ei addysg gan ei dad, a gallai ganu'r delyn yn lled dda. Yn 15 oed cafodd wobr am ganu'r delyn yn eisteddfod Merthyr, 1859. Enillodd ysgoloriaeth eisteddfod genedlaethol Abertawe, 1863, am ganu 'Sweet Richard,' a threfnodd y pwyllgor iddo gael gwersi gan Llewelyn Williams ('Pencerdd y De'). Yn eisteddfod Caer, 1866, dyfarnodd John Thomas ('Pencerdd Gwalia') y wobr o delyn bedal, gwerth £50, iddo, ac enillodd delyn deir-res yn eisteddfod Llanymddyfri. Yr oedd galwadau mawr arno fel telynor, athro ar y delyn, a beirniad ar ganu'r delyn. Derbyniodd y radd o ddoethur o'r Almaen. Priododd gerddores dalentog, o'r enw Sarah Ada Gedrych, a symudasant i fyw i Gaerdydd. Sefydlodd y ' Frost Concerts ' a wnaeth wasanaeth mawr i gerddoriaeth yn y ddinas. Cyfansoddodd nifer o ganeuon, a bu ' Hen Gymru fynyddig ' a ' Hoff Fryniau fy Ngwlad ' yn boblogaidd. Bu farw 25 Chwefror 1891 yn 5 The Parade, Caerdydd.

Awdur

• Robert David Griffith, (1877 - 1958)

Ffynonellau

• Y Cerddor, Ebrill 1891, Gorffennaf 1893
• R. Griffith, Llyfr Cerdd Dannau (Caernarfon 1913)
• Edward Jones, Rhestr gyda nodiadau byrion, o Enwogion Cymreig o 1700 i 1900 (1908)
• David Morgans, Music and musicians of Merthyr and district: Together with a list of eisteddfodau to the year 1901 (Merthyr Tydfil 1922)

Darllen Pellach

• Erthygl Wicipedia: William Frost

Dolenni Ychwanegol

• Wikidata: Q20734616

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/