GIBBON, JAMES MORGAN (1855 - 1932), gweinidog gyda'r Annibynwyr

Ganwyd yn Pont-ar-Seli, 1855. Yr oedd yn aelod o eglwys Bryn Seion, lle hefyd y magwyd y Dr. Herber Evans. Addysgwyd ef yn ysgol uwchraddol Castellnewydd Emlyn a Choleg Presbyteraidd Caerfyrddin (1872-5). Urddwyd ef yn 1875 yn weinidog Trelech; aeth i'r weinidogaeth Seisnig a bu'n gweinidogaethu yn eglwysi Castle Street, Abertawe (1880-5); Highgate, Llundain (1885-9); Stamford Hill, Llundain (1889-1932). Bu farw Mawrth 1932.

Bu'n eithriadol boblogaidd fel pregethwr; o dan ei weinidogaeth cynyddodd aelodaeth Stamford Hill o 355 i 1,055. Yr oedd yn aelod amlwg o glwb Caleb Morris yn Llundain, a pharhaodd yn Gymro twymgalon ar hyd ei oes. Etholwyd ef yn aelod o'r comisiwn ar 'The Church of England and other Religious Bodies in Wales and Monmouthshire' (1910). Gwrthododd arwyddo'r adroddiad, ac ar gais Cyngor yr Eglwysi Rhyddion drwy F. B. Meyer cyhoeddodd lyfr i egluro ei safbwynt: Weighed in the Balance: The Case for Welsh Disestablishment, gyda rhagair gan D. Lloyd George, 1910. Bu'n gadeirydd Undeb Annibynwyr Lloegr a Chymru (1913-4). Cyhoeddodd: The Epistle to the Galatians, 1895; The Children's Tear; The Fatherhood of God; The Disciples' Prayer.

Awdur

• Y Parchedig Richard Griffith Owen, (1890 - 1973)

Ffynonellau

• The Congregational Year Book, 1933
• Hanes Eglwysi Annibynnol Cymru, v, 324
• E. Pan Jones, Oriel Coleg Presbyteraidd, Caerfyrddin: yn cynwys hanes yr holl fyfyrwyr fu yn y coleg o 1796 hyd 1899 (Merthyr Tydfil 1909), 137
• Y Dysgedydd, Ebrill 1932, 127

Dolenni Ychwanegol

• VIAF: 305371985
• Wikidata: Q20733328

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/