GRIFFITHS, MORRIS (fl. 1766-1805), cynghorwr Methodistaidd, gweinidog gyda'r Bedyddwyr, ac emynydd

Cawn ef yn gynghorwr gyda'r Methodistiaid ym Mhrendergast, ger Hwlffordd, Sir Benfro, yn 1766; ' lay preacher ' oedd pan alwodd yn Nhrefeca yn 1776. Bedyddiwyd ef yn 1779 yn Llangloffan, ac urddwyd ef yn un o weinidogion yr eglwys honno yn 1788. Bu farw yn 1805. Cymysgir ef yn aml â Morris Griffiths, Trefgarn. Cyhoeddodd Marwnad … John Davies, Pregethwr yr Efengylyn Sir Benbro, c. 1765; Defnyddiol Hymnau i Breswylwyr y Graig (Trefeca, 1779); Llythyr Caredig, 1786; Egwyddorion Difinyddiaeth, 1789 - math o gyffes ffydd a phennill ar ddiwedd pob pwnc ynghyda thri emyn; a Dammeg, mewn Dull o Ymddiddan rhwng Credadyn a Mr. Ewyllys-Rhydd a Satan (Trefeca, d.d.). Yn ôl ' Gwilym Lleyn ' cyhoeddodd hefyd Dull o Ymddiddan rhwng Gweinidog yr Efengyl, a Disgybl ieuanc dan holiad, yn 1784. Ni bu ei emynau erioed mewn bri.

Awdur

• Y Parchedig Gomer Morgan Roberts, (1904 - 1993)

Ffynonellau

• David Jones, Hanes y Bedyddwyr yn Neheubarth Cymru (1839), 188, 192
• Joshua Thomas, Hanes y Bedyddwyr ymhlith y Cymry: o amser yr Apostolion, hyd y flwyddyn hon: yn ddwy ran (Caerfyrddin 1778). (arg. 1885) 537-8, 540
• Cylchgrawn Cymdeithas Hanes y Methodistiaid Calfinaidd, viii, 68-9; xviii, 29-30, 73-7; xxxiii, 47
• Y Cymmrodor, xlv, 38
• Gweler ymhellach Cylchgrawn Cymdeithas Hanes y Methodistiaid Calfinaidd 1952, ar y ddau Morris Griffiths hyn

Dolenni Ychwanegol

• Wikidata: Q20733973

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/