GRIFFITH, GEORGE WILLIAM (1584 - 1655?), tir-feddiannwr, cyfreithiwr, ustus heddwch, hynafiaethydd

o Benybenglog, Sir Benfro; ganwyd 21 Ebrill 1584, mab hynaf William Griffith. Priododd, 22 Tachwedd 1605, Maud Bowen o Lwyngwair, a bu iddynt saith o blant. Penodwyd ef yn ysgrifennydd cyhoeddus yn Sir Benfro gan gyngor y gororau, yr oedd yn ddistain barwniaeth Cemaes, cynorthwyodd George Owen, Henllys, gyda'i ymchwiliadau hanesyddol, ac ysgrifennodd lawer o lawysgrifau achau. Croesawodd feirdd Cymru benbaladr i'w blas, ac ef oedd un o'r boneddwyr olaf yn Ne Cymru i noddi beirdd yn ôl yr hen arferiad. Yn ystod y Rhyfel Cartrefol ochrodd gyda Cromwell, ac yr oedd yn aelod o bwyllgorau seneddol. Ymosodwyd ar Benybenglog gan filwyr y brenin, a difrodwyd ei eiddo. Profwyd ei ewyllys yn P.C.C. ar 9 Awst 1655. Claddwyd ef ym Meline.

Awdur

• Major Francis Jones

Ffynonellau

• Trafodion Anrhydeddus Gymdeithas y Cymmrodorion, 1938 a 1949
• MSS. yn LI.G.C. a'r College of Arms

Darllen Pellach

• Erthygl Wicipedia: George William Griffith

Dolenni Ychwanegol

• Wikidata: Q20200832

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/