HARRY, NUN MORGAN (1800 - 1842), gweinidog gyda'r Annibynwyr

Ganwyd 9 Mehefin 1800 ym mhlwyf Llanbedr Efelffre, Sir Benfro. Collodd ei dad yn ifanc, a chyda'i daid y magwyd ef a'i dri brawd; cawsant addysg dda. Yn eglwys Henllan y derbyniwyd ef yn aelod yn 17 oed, ac yno y dechreuodd bregethu. Drwy gymorth yr arglwyddes Barham, a gymerai ddiddordeb ynddo, aeth i goleg Newport Pagnell, swydd Buckingham, yn 1822. Urddwyd ef yn weinidog eglwys Annibynnol Banbury, 25 Ebrill 1827; symudodd oddi yno 15 Awst 1832 i ofalu am eglwys New Broad Street, Llundain, lle y bu hyd ei farwolaeth 22 Hydref 1842; claddwyd ef ym mynwent Abney Park, Llundain. Yr oedd ef a Caleb Morris yn gyfeillion mynwesol.

Yn 1832 cyhoeddodd gyfrol o 12 darlith ar berson Crist dan y teitl What think ye of Christ? Ei bennaf ddiddordeb oedd y mudiad heddwch; yn 1837 daeth yn gyd-ysgrifennydd i'r Gymdeithas Heddwch a bu'n golygu The Herald of Peace. Gweithiodd hefyd lawer dros y Morafiaid.

Awdur

• Y Parchedig Richard Griffith Owen, (1890 - 1973)

Ffynonellau

• Oxford Dictionary of National Biography, xxv, 51
• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), i, 489-92
• Geirlyfr Bywgraffiadol o Enwogion Cymru (1870), 475
• Caleb Morris, The servant of the age a discourse occasioned by the death of the Rev. N. M. Harry, minister of New Broad Street Meeting House, and one of the secretaries of the Peace Society (1843)
• D. Tyssil Evans, Cofiant a detholiad o bregethau y Parch Caleb Morris, Fetter Lane, Llundain / The life and ministry of the Rev. Caleb Morris who was the minister of the Tabernacle, Narberth; and of Fetter Lane Chapel, London (Caerdydd 1900, 1902), 220

Dolenni Ychwanegol

• Wikidata: Q18576797

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/