HOWELLS, HOWELL (1750 - 1842), clerigwr Methodistaidd

Ganwyd 12 Mai 1750 yn Ystradgynlais, Brycheiniog. Ymunodd yn ieuanc â seiat y Methodistiaid, a dechreuodd bregethu pan oedd ar daith gyda John Evans, Cil-y-cwm, yn y Gogledd. Addysgwyd ef yn Llanddowror c. 1778. Ordeiniwyd yn ddiacon yn 1781; 'Curate of Ystradgynlais' y gelwir ef pan gafodd urdd offeiriad yn 1782. Dywedir iddo wasanaethu wedyn yng Nglyncorrwg, ond aeth i S. Nicholas, Bro Morgannwg, yn ddiweddarach. Cymdeithasodd lawer yno â David Jones, Llan-gan, a daeth i wrthdarawiad â pherson y plwyf oherwydd ei Fethodistiaeth. Cafodd le fel curad Llanddiddan Fach, ger Trehyl, a deuai Methodistiaid y fro ato'n dyrfaoedd yno i gymuno. Gorfu iddo roi'r lle i fyny yn 1818, ac o hynny hyd ei farw ar 19 Ionawr 1842 fe ymlynodd wrth y Methodistiad, gan gymryd rhan yn aml yn eu sasiynau ordeinio. Bu'n briod ddwywaith, (1) â Miss Thomas, merch offeiriad Tresimwn, a (2) â Miss Samuel o'r Bont-faen.

Awdur

• Y Parchedig Gomer Morgan Roberts, (1904 - 1993)

Ffynonellau

• Thomas Morgan, Galarnad ar ôl y Parchedig Howell Howells, gynt o Drehill, Swydd Forganwg, yr hwn a fu farw ar y 19eg o Ionawr MDCCCXLII, yn y 92 flwydd o'i oed (Caerdydd 1842)
• Y Drysorfa, 1842, 161-3
• J. Morgan Jones a W. Morgan, Y Tadau Methodistaidd (1895-1897), ii, 300-5
• The Episcopal Registers of the Diocese of St. David's, 1397–1518 (1917–20), No. 5

Dolenni Ychwanegol

• Wikidata: Q20733181

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/