HUGHES, EVAN ('Hughes Fawr '; bu farw 1800), curad ac awdur

Brodor o Llangeitho ydoedd, medd rhai. Bu'n gurad yn Llaniestyn, Llandegwning, Penllech yn Llŷn, 1762-4, a Llanfihangel-y-pennant, Eifionydd, 1772-9. Arferai bregethu yn y mynwentydd yn y lleoedd hyn gan fod nifer y rhai a ddeuai i'w wrando yn fwy nag a allai fynd i mewn i'r eglwysi. Yr oedd yn bleidiol iawn i'r ysgolion cylchynol a gynhelid yn Llŷn ac Eifionydd, ac ysgrifennodd at Madam (Bridget) Bevan yn 1773 yn dwyn tystiolaeth i'w llwyddiant a gofyn am estyniad tymor yr ysgol yn Llanfihangel-y-pennant. Gallai ateb cwestiynau esgob Bangor ar ei ymweliad yn 1776 a dywedyd bod 70 yn cymuno bob mis yn Llanfihangel a thua 200 y Pasg. Yr oedd yn gyfeillgar â Robert Jones, Rhoslan. Yn 1779 symudodd i fod yn gurad yn Ysbyty Ifan, a thra bu yno pregethai yn aml yng nghartrefi Methodistiaid. Tua'r flwyddyn 1783 aeth i Drawsfynydd yn gurad ac, ar 23 Mehefin 1792, i Llanuwchllyn, lle y bu farw tua chanol mis Mai 1800. Cyhoeddodd Duwdod Crist, 1777, a Rhai Hymnau Newyddion o Fawl i'r Oen, 1783. Ceir rhai emynau o'i waith mewn llawysgrifau (e.e. yn rhai o ysgriflyfrau ' Dafydd Sion Siams ').

Awdur

• Robert (Bob) Owen, (1885 - 1962)

Ffynonellau

• D. E. Jenkins, Life of Thomas Charles (Dinbych 1908), i, 384, 404; ii, 403, 405, 409
• Cymru (O.M.E.), xii, 251-4
• Llais Rhyddid, 1918, 133-4
• Yr Haul, 1867
• Welch piety, or, A farther account of the circulating Welch charity schools … to which are annexed testimonials relating to the masters and scholars of the said schools; in a letter to a friend (1742-60), 1773-4

Dolenni Ychwanegol

• Wikidata: Q20733025

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/