HUGHES, JOHN EVAN (1865 - 1932), gweinidog gyda'r Methodistiaid Calfinaidd a golygydd

Ganwyd yng Nghaernarfon, mab Evan Hughes. Bu yn academi Tywyn, yn ysgol Clynnog, Coleg Aberystwyth, a Choleg S. Ioan, Caergrawnt. Graddiodd yn B.A. ym Mhrifysgol Llundain, 1886, ac yng Nghaergrawnt, 1891, gan gymryd ei M.A. yno yn 1896. Cymerodd radd B.D. Prifysgol Llundain yn 1911. Dechreuodd bregethu yn 1892, ac yn 1894 galwodd eglwys Seilo, Caernarfon, yr eglwys y magwyd ef ynddi, ef yn weinidog, ac yno y bu hyd ei ymddiswyddiad, oherwydd gwaeledd iechyd, yn 1926. Bu farw yng Nghaernarfon 11 Mawrth 1932. Yr oedd yn bregethwr da, ond lluddiodd ei iechyd ef rhag gwneud yr hyn a ddymunai yn y cyfeiriad hwn. Bu'n arholydd mewn gwybodaeth Feiblaidd i Fwrdd Canol Cymru, ac yn 1915 traddododd y Ddarlith Davies ar ' Y syniad offeiriadol a'r syniad proffwydol am grefydd.' Penodwyd ef i olygu 'r Traethodydd yn 1905, a bu'n ei olygu ei hun hyd ddiwedd 1928, pan benodwyd bwrdd golygyddol, gydag ef yn gadeirydd. Ychydig a ysgrifennodd, ac yr oedd yn fwy o ysgolhaig nag o lenor. 'Ymhyfrydai,' medd yr ysgrif goffa yn Y Traethodydd, 'mewn gwybodaeth fanwl o bob pwnc a efrydid ganddo.' Priododd Lily Charles, merch R. J. Davies, Cwrt Mawr, Llangeitho, a chwaer y diweddar brifathro J. H. Davies.

Awdur

• Edward Morgan Humphreys, (1882 - 1955)

Ffynonellau

• Blwyddiadur y Methodistiaid Calfinaidd, 1933
• Y Traethodydd, 1932, 71; 1933, 73

Dolenni Ychwanegol

• Wikidata: Q20733408

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/