JAMES, JOHN (bu farw 1705), gweinidog Annibynnol

Addysgwyd ef yn Ystrad Wallter neu Abertawe. Ordeiniwyd ef yn Llanybri, 1688. Estynnwyd rhodd iddo o ddwy bunt gan y Bwrdd Presbyteraidd (16 Ionawr 1690) i'w galonogi yn ei waith yn y Cruglas (Panteg). Ategir ei fod yn y Cruglas yng nghofnodion yr ' Common Fund ' neu'r Bwrdd Presbyteraidd (1690-2), a'i fod yn rhyddddeiliad ac wedi derbyn punt o gydnabyddiaeth gan ei gynulleidfa. Yr oedd yn bresennol yn Nhirdoncyn, 17 Tachwedd 1697, ar ddydd neilltuo Llewelyn Bevan i Gwmllynfell a Gellionnen. Yn ôl adroddiad wardeiniaid plwyf Henllan Amgoed (4 Medi 1705) pregethai i gynulleidfa Lewis Thomas - plaid y Calfiniaid. Bu farw yn y flwyddyn honno.

Awdur

• Y Parchedig John Dyfnallt Owen, (1873 - 1956)

Ffynonellau

• D. Peter, Hanes Crefydd yng Nghymru, o'r amser y daeth y Cymry i Ynys Brydain hyd yr amser presennol (Caerfyrddin 1816), 594
• Minutes of the Pres. Board, 16 Ionawr 1690
• Llawysgrif o eiddo'r Presbyterian Board, a gyhoeddwyd gan Alexander Gordon dan y teitl Freedom after Ejection. A Review (1690–1692) of Presbyterian and Congregational Nonconformity in England and Wales, 1917, 291
• Hanes Eglwysi Annibynnol Cymru, iii, 384
• Llyfr Eglwys Tirdoncyn yn Llyfrgell Genedlaethol Cymru, 17 Tachwedd 1697
• Henllan Amgoed churchwardens' accounts, 4 Medi 1705

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/