JARDINE, DAVID (1732 - 1766), gweinidog Annibynnol ac athro academi

Ganwyd yn Ninbych, mab James Jardine. Bu'n fyfyriwr yn athrofa Caerfyrddin, 1752-4. Urddwyd ef yn y Fenni, 1754, a chychwynnodd ysgol yno. Oherwydd ymrafael ar gwestiwn athrawiaeth a ddysgid yn athrofa Caerfyrddin gwrthododd y Bwrdd Cynulleidfaol (Llundain) roddi cymorth ariannol tuag ati; cymeradwywyd David Jardine i fod yn athro yr academi yng Nghymru, 27 Chwefror 1757, a phenodwyd ef yn bennaeth yr academi newydd yn y Fenni, 7 Mawrth 1757, a Benjamin Davies yn gynorthwywr iddo. Parhaodd Jardine yn weinidog yr eglwys yn y Fenni ac yn bennaeth yr academi hyd ei farwolaeth, 1 Hydref 1766. Priododd ferch y Parch. Lewis Jones, Penybont-ar-Ogwr. Yr oedd yn athro rhagorol a daeth amryw o'i fyfyrwyr yn oleuadau mawr ymhlith yr Annibynwyr.

Awdur

• Y Parchedig John Dyfnallt Owen, (1873 - 1956)

Ffynonellau

• Hanes Eglwysi Annibynnol Cymru, i, 49
• H. Blackwell, NLW MSS 9261A: A Dictionary of Welsh Biography
• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), i, 597

Dolenni Ychwanegol

• Wikidata: Q20732834

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/