JONES, BASSETT, M.D., meddyg ac ysgolhaig o ganol y 17eg ganrif.

Mab Richard Jones, yswain ac ustus heddwch, o Lanmihangel (ar Elai), Morgannwg, a Jane ei wraig, ferch Thomas Bassett, o Frofiscin. Aeth Bassett i Goleg Iesu, Rhydychen, yn 1634, ac yna i Brifysgol Franeker yn yr Iseldiroedd, a mannau eraill ar y Cyfandir, lle bu'n astudio anianeg a chemeg. Dychwelodd adref, ac yn 1648 (blwyddyn brwydr Sain Ffagan) cyhoeddwyd yn Rhydychen ei Lapis chymicus philosophorum examini subjectus. Bu iddo ran yng nghweryl ei deulu â'r cyrnol Philip Jones ynglyn â stad Wrinston, Morgannwg, a chyhoeddwyd dogfennau'r helynt yn 1654 gan gynnwys apêl Bassett Jones at Cromwell, a'i sylwadau ar ateb Philip Jones. Yn 1659 cyhoeddwyd ei Hermaelogium, or, an Essay at the Rationality of the Art of Speaking, As a supplement to Lillie's Grammer [sic], philosophically, mythologically and emblematically offered by B.J. (Llundain).

Gwraig Bassett Jones oedd Catherine, ferch William Lloyd. Os o sir Frycheiniog yr oedd hon, yna fe esbonnir hwyrach y cyfeiriad gan G. T. Clark at ei feddiant o diroedd ym Mhencelli, sir Frycheiniog, er nad oes gan Theophilus Jones gyfeiriad at hyn. Yn ôl ewyllys Richard (bu farw 1659), tad Bassett Jones, yr oedd gan Bassett fab o'r enw Thomas Jones o ryw Marie Hughes, a merch o'r enw Marie Jones o ryw Katherine Miles. Yn ôl achau'r Golden Grove Book ni chafodd blant o'i wraig Katherine Lloyd.

Awdur

• David Myrddin Lloyd, (1909 - 1981)

Ffynonellau

• Archaeologia Cambrensis, 1889, 198-213
• Oxford Dictionary of National Biography
• G. T. Clark, Limbus Patrum Morganiae et Glamorganiae (1886)
• catalog Llyfrgell y B.M.
• Anthony Wood, Athenae Oxonienses (1813–20)
• Llawysgrif Harley yn yr Amgueddfa Brydeinig 6108 (51)

Dolenni Ychwanegol

• Wikidata: Q4868074

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/