JONES, DAVID (1788 - 1859), gweinidog gyda'r Annibynwyr

Ganwyd ym Mhant-y-blawd (neu ' Brynblawd'), Llanfihangel Cilfargen; yr oedd yn or-ŵyr i Thomas Williams, gweinidog Capel Isaac, ac yn yr eglwys honno y magwyd yntau. Cafodd addysg dda, ac yr oedd yn fedrus iawn fel meddyg anifeiliaid - yn ôl ' Gwilym Lleyn ' (yn Enw F.) cyhoeddodd lyfr, Y Ceffyl. Wedi iddo briodi ac ymsefydlu ar ei dyddyn ei hun, Pantarfon, y dechreuodd bregethu, ac ar 3 Gorffennaf 1822 galwyd ef i fugeilio eglwys Gwynfe, a oedd gryn bellter o'i gartref; bu cynnydd mawr yn yr eglwys dan ei weinidogaeth. Bu'n fugail arni hyd ei farwolaeth, ond byddai hefyd yn gofalu am eglwysi eraill dros dro, megis Capel Isaac (1832-42) a Chrug-y-bar (1826-9); ac efe yn bennaf a sefydlodd eglwys Siloam, Pont-ar-Gothi (1822). Cyhoeddwyd ysgrifau ganddo yn Lleuad yr Oes, Yr Efangylydd, a'r Diwygiwr. Bu farw ym Mhantarfon, 29 Ebrill 1859, yn 71 oed, a chladdwyd yng Nghapel Isaac.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Hanes Eglwysi Annibynnol Cymru, iii, 447, 532, 551, 571-2
• Geirlyfr Bywgraffiadol o Enwogion Cymru (1870)

Dolenni Ychwanegol

• Wikidata: Q20732847

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/