JONES, DAVID LEWIS (1788 - 1830), gweinidog Ariaidd ac athro coleg

Ganwyd 8 Ebrill 1788, yng Nglynadda, ger Llanpumsaint, Sir Gaerfyrddin. Fe'i codwyd ymhlith yr Annibynwyr ym Mhencader. Addysgwyd ef gan ' Davis Castellhywel ' ac yng Ngholeg Caerfyrddin (1807-11). Fe'i hordeiniwyd yn Llwynrhydowen, 30 Awst 1811, fel cyd-weinidog â David Davis, Castellhywel, ac agorodd ysgol yn Llandysul. Armin ydoedd adeg ei ordeinio, ond mynnir ei fod yn Ariad yn niwedd ei oes. Ni bu yma'n hir oherwydd fe'i hetholwyd yn athro yn y clasuron yng Ngholeg Caerfyrddin yn 1814, ac yn weinidog Capel Seion, Llanddarog, a bu yma hyd ei farw cynnar ar 8 Medi 1830 yn 41 mlwydd oed. Bu cynnwrf adeg ei apwyntio'n athro, a cheisiodd David Davis, Castell Nedd, a John James, Gellionnen, sefydlu academi newydd ond ni ddaeth dim o'r peth. Yn ystod pum mlynedd olaf ei oes yr oedd yn weinidog ar eglwys Undodaidd Caerfyrddin. Ymhyfrydai yn hanes, llên, a hynafiaethau Cymru, a chyfansoddai farddoniaeth dan yr enw ' Glynadda.' Claddwyd ef ym mynwent Capel Seion.

Awdur

• Y Parchedig Thomas Oswald Williams, (1888 - 1965)

Ffynonellau

• Hanes Plwyf Llandyssul (1896), 152-3
• The Unitarian Students at the Presbyterian College, Carmarthen … 1796–1901 (1901), 113-6
• Yr Ymofynnydd, 1864, 123
• E. Pan Jones, Oriel Coleg Presbyteraidd, Caerfyrddin: yn cynwys hanes yr holl fyfyrwyr fu yn y coleg o 1796 hyd 1899 (Merthyr Tydfil 1909), 29

Dolenni Ychwanegol

• Wikidata: Q20732855

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/