JONES, RICHARD (1603 - 1655/6?), Llanfair Caereinion, clerigwr ac awdur

Ganwyd 1603, yn fab i John Pew o Henllan, sir Ddinbych, yn ôl A. Wood, Athenae Oxionienses, a J. Foster, Alumni Oxonienses, ond John ap Hugh o Hendre Caerwys, Llaneurgain, Sir y Fflint, yn ôl Thomas, S. Asaph. Addysgwyd ef yng Ngholeg Iesu, Rhydychen, a graddiodd yn B.A. yn Chwefror 1625-6 ac yn M.A. Gorffennaf 1628. Apwyntiwyd ef yn ficer Llanfair Caereinion, Sir Drefaldwyn, yn 1636, ond diswyddwyd ef gan Gyngor Lledaeniad yr Efengyl yng Nghymru yn eu cyfarfod yn Llanfyllin, 11 Mehefin 1650. Parhaodd, er hynny, i bregethu a gweinyddu yn ei hen blwyf, a bu teulu Vaughan o Lwydiarth yn noddwyr iddo. Cymysgwyd yn aml rhyngddo a'i gyfenw Richard Jones o Ddinbych.

Yn ystod ei ddifreiniad cyhoeddodd ddau waith, y ddau ohonynt yn grynodebau o gynnwys y Beibl mewn mesur rhydd. Ymddangosodd ei Testun Testament Newydd ein Harglwydd … yn Benhillion Cymraeg, yn Ionawr 1652-3, a Perl y Cymro neu Cofiadur y Beibl ar fesurau Psalmau Dafydd, yn 1655. Bu farw yn niwedd 1655 neu ddechrau 1656.

Awdur

• Griffith Milwyn Griffiths

Ffynonellau

• Anthony Wood, Athenae Oxonienses (1813–20)
• Foster, Alumni Oxonienses: the members of the University of Oxford
• H. B. Thomas, A History of the Diocese of St. Asaph (1874)
• Thomas Shankland, 'Cynnyg i Benderfynu Hen Ddadl Lyfryddol'
• T. Richards, A History of the Puritan Movement in Wales (1920) a Religious Developments in Wales, 1654–1662 (1923)
• J. C. Morrice, Wales in the Seventeenth Century its literature and men of letters and action (Bangor 1918)

Dolenni Ychwanegol

• Wikidata: Q7326925

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/