LLOYD (neu FLUDD), GEORGE (1560 - 1615), esgob Caer

Pumed mab Meredydd (Lloyd) ap John ap Maredydd Llwyd o Fiwmares; ganwyd yn Bryn Euryn, Llandrillo yn Rhos, a etifeddasai ei fam, Jonet Conwy, trwy ei thad, Hugh Conwy Vychan, a oedd yn disgyn o Marchudd, sefydlydd un o bymtheg llwyth Gwynedd. Yr oedd yn 'ysgolor' yn y King's School, Caer, 1575-9; aeth i Goleg Iesu, Caergrawnt, yn 1579, a graddiodd yn B.A. 1583, M.A. 1586, B.D. 1593, D.D. 1598. Cafodd gymrodoriaeth yng Ngholeg Magdalene, c. 1586, daeth yn rheithor Heswall, 1597-1613, ac yn rheithor Bangor Iscoed, 1612-5. Yn 1600 fe'i cysegrwyd yn esgob Sodor a Man, eithr yn Rhagfyr 1604 fe'i cyfnewidiodd am esgobaeth Caer; yno gwrthdroes bolisi gwrth- Biwritanaidd ei ragflaenydd Cymreig, Richard Vaughan, a fuasai'n esgob Bangor yn gynharach.

Bu farw 1 Awst 1615, a chladdwyd ef yn eglwys gadeiriol Caer, lle y mae arysgrif ar fur yn ei goffáu - gweler y geiriad yn Ormerod, Cheshire, arg. 1882, i, 192. Yn y flwyddyn y bu farw prynodd Pant Iocyn, gerllaw Wrecsam (cartref yr Almeriaid), a barhaodd yn gartref i'w deulu hyd 1634.

Awdur

• Yr Athro Emeritus Arthur Herbert Dodd, (1891 - 1975)

Ffynonellau

• Oxford Dictionary of National Biography, a'r ffynonellau a enwir yno
• Venn, Alumni Cantabrigienses, I, i, 94
• J. E. Griffith, Pedigrees of Anglesey and Carnarvonshire Families (1914), t. 290
• H. B. Thomas, A History of the Diocese of St. Asaph (1874) (arg. 1911), i, 435; ii, 343
• A. N. Palmer, History of the thirteen country townships of the old parish of Wrexham, and of the townships of Burras Riffri, Erlas, & Erddig Being the fifth and last part of "A history of the town and parish of Wrexham" (1903), 1903, 175-6
• Transactions of the Chester Architectural, Archaeological, and Historic Society (1857–1909), n.s., vi, 245-8

Dolenni Ychwanegol

• VIAF: 34018391
• Wikidata: Q5541776

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/