LLOYD, RICHARD (1771 - 1834), gweinidog gyda'r Methodistiaid Calfinaidd

Ganwyd yn Nantdaenog, Llantrisant, Môn, yn 1771, yn chweched plentyn i William Lloyd a'i wraig Jane, ferch yr hen Ymneilltuwr adnabyddus William Prichard o Glwch-dyrnog; ei daid o ochr ei dad oedd David Lloyd ap Rhys, o blwyf Heneglwys (J. E. Griffith, Pedigrees, 100); yn ei ysgrifau yng Ngoleuad Cymru, byddai Richard Lloyd yn ei alw'i hunan yn ' Rhisiart William Dafydd.' Ymunodd â seiat Fethodistaidd Gwalchmai yn 1789, a dechreuodd bregethu yn 1794. Priododd yn 1800, ac aeth i gadw siop ddillad ym Miwmares. Ordeiniwyd ef (fel ei gyd-ynyswr a'i gyfaill John Elias) yn ordeiniad 1811 yn y Bala. Bu farw 25 Mai 1834, yn 63 oed, a chladdwyd yn Llanfaes - claddwyd John Elias yntau wrth ei ochr. Disgrifir ef fel gŵr ffraeth a diddan, rhyw gymaint o fardd, a phregethwr da.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Joseph Evans, Biographical Dictionary of Ministers and Preachers of the Welsh Calvinistic Methodist Body … to the close of the year 1850 (1907)
• Richard Parry ('Gwalchmai'), Enwogion Môn: henafol a diweddar, mewn cofnodau hanesol (1877)

Dolenni Ychwanegol

• Wikidata: Q20738143

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/