MORGAN, EVAN (1809 - 1853), gweinidog gyda'r Methodistiaid Calfinaidd ac awdur

Ganwyd yn 1809, mab Evan Morgan, un o flaenoriaid hen gapel Seion, Caerdydd. Saernïwyr cerrig beddau oedd THOMAS MORGAN (1816 - 1858), ei frawd, ac yntau.

Dechreuodd bregethu yn 1830, yr un adeg ag Edward Matthews, cyfaill mawr y teulu. Ordeiniwyd ef yn sasiwn Llangeitho, 1841. Trigodd yng Nghaerdydd ar hyd ei oes, a bu rhyw gyswllt bugeiliol rhyngddo a Seion. Priododd, 1836, Mary Morgan, Clunhir, Pontardulais. Cyhoeddodd Tŵr y Praidd (dwy ddarlith) yn 1851, a Boanerges: neu, Hanes Bywyd Morgan Howells , yn 1853. Mewn afiechyd y dechreuodd lenydda, ond llaw angau a'i rhwystrodd rhag cyflawni ei addewid. Bu farw 10 Awst 1853. Priododd ei weddw â'r Parch. Richard Lumley.

Cyhoeddodd Edward Matthews bregeth goffa iddo yn 1853, a phregeth gyffelyb (Y Diacon) i goffadwriaeth Thomas Morgan yn 1859.

Awdur

• Y Parchedig Gomer Morgan Roberts, (1904 - 1993)

Ffynonellau

• Y Drysorfa, 1835, 182; 1853, 316; 1858, 414
• Y Cylchgrawn: sef cyfrwng gwybodaeth grefydol a buddiol ac hanesion eglwysig a gwladol, 1852, tt.21-22; 1853, t.287
• W. Evans, Cofiant y Parchedig William Evans, Tonyrefail, yn cynwys ei gynghorion gweinidogaethol, areithiau dirwestol, llythyrau, a nifeer o bregethau, gan ei wyr (1892), 148
• J. J. Morgan, Cofiant Edward Matthews, Ewenni (Yr Wyddgrug 1922), 307-18
• T. Bowen, Dinas Caerdydd a'i Methodistiaeth Calfinaidd (Eglwys Bresbyteraidd Cymru) (Caerdydd 1927), 17-22
• Yr Haul, i, 546

Darllen Pellach

• E. Matthews, Pregeth ar farwolaeth y Parch. E. Morgan, Caerdydd, a draddodwyd yn nghapel y Trefnyddion Calfinaidd yn y dref hono, ar nos Sul, Awst yr 28ain 1853 (Caerdydd 1853)
• Presentation of a Testimonial to Mr T. Morgan, Sculptor, Cardiff, Cardiff and Merthyr Guardian, 10 Hydref 1857

Dolenni Ychwanegol

• Wikidata: Q20733038

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/