ROBERTS, JOHN ASKEW (1826 - 1884), hynafiaethydd, awdur, a newyddiadurwr

Ganwyd 27 Mawrth 1826 yng Nghroesoswallt, mab Samuel Roberts, llyfrwerthwr. Yn 1848 yr oedd yn ysgrifennu i Oswald's Well, cylchgrawn a ddilynwyd yn 1849 gan yr Oswestry Advertiser, a gychwynnwyd gan Askew Roberts yn fisolyn, ac wedyn yn wythnosolyn, ac y bu'r cychwynnydd mewn cysylltiad ag ef am 20 mlynedd. Wedi iddo werthu hawlfraint yr Advertiser ac ymneilltuo o'r swydd o olygydd, parhaodd Roberts i gyfrannu i'w golofnau o bryd i bryd hyd 1871, pryd y dechreuodd ofalu am y golofn hynafiaethau, a elwid Bye-Gones, a ddaeth i'w chysylltu mwyach ag enw Roberts, ac a ymddangosodd am gyfnod hir, gan gael ei hailgyhoeddi yn rhannau chwarterol. Un o'r ysgrifenwyr mwyaf cyson i Bye-Gones oedd W. W. E. Wynne, Peniarth, Sir Feirionnydd, ysgolhaig a hynafiaethydd y cydweithiodd Roberts ag ef i ddwyn allan argraffiad 1878 o lyfr Syr John Wynn, Gwydir, sef The history of the Gwydir family . Cyhoeddodd Roberts hefyd Contributions to Oswestry History 1881; Wynnstay and the Wynns , 1876; a gwaith a gafodd gylchrediad eang, sef The Gossiping Guide to Wales. Gydag Edward Woodall golygodd The Pictorial Itinerary, an Illustrated Guide to the Railways and Coach-Roads of North Wales (Oswestry, 1882). Ysgrifennai i gyhoeddiadau'r Shropshire Archaeological Society a'r Powys-land Club. Heblaw'r Advertiser cychwynnodd, 1860, The Merionethshire Standard, a ymgorfforwyd yn y Cambrian News yn ddiweddarach. Bu farw 10 Rhagfyr 1884, yn 58 oed.

Awdur

• Syr William Llewelyn Davies, (1887 - 1952)

Ffynonellau

• Bye-Gones, relating to Wales and the Border Counties, 1884, 146, 151, 184, 267, a 1885, 267
• Archaeologia Cambrensis, 1885, 75-6

Dolenni Ychwanegol

• Wikidata: Q20733352

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/