ROBERTS, ROBERT (1840 - 1871), cerddor

Ganwyd 24 Mai 1840 yn Tanysgafell, Bethesda, Sir Gaernarfon. Yn 12 oed bu farw ei dad, a bu raid iddo fynd i weithio i'r chwarel. ' Eos Llechid ' a ddysgodd iddo elfennau cerddoriaeth a chaniadaeth, a chymerodd Henry Samuel Hayden, athro coleg hyfforddi Caernarfon, ddiddordeb ynddo oherwydd ei ddoniau arbennig, ac aeth am gwrs o addysg i'r coleg yn 14 oed. Oherwydd ei lwyddiant gyda'i efrydiau apwyntiwyd ef yn athro cynorthwyol yn y coleg, ac wedi marw'r athro apwyntiwyd ef yn olynydd iddo. Yn 1866 penodwyd ef yn is-organydd eglwys gadeiriol Bangor, ac yn ddiweddarach, wedi marw'r organydd, yn organydd, a daliodd y swydd hyd ei farwolaeth. Ef oedd unig Gymro 'r cyfnod a ddaliodd y swydd o organydd yn eglwys gadeiriol Bangor. Yr oedd yn chwaraewr medrus ar y piano, y ffidil, a'r sielo. Cyfansoddodd nifer mawr o ddarnau cerddorol. Bu ei ganig ' Y Gwlithyn ' yn boblogaidd, a hefyd ' Tynnwn ein rhwyfau yn gryf.' Cyfansoddodd gantawd, ' Gwarchae Harlech,' a cheir tonau o'i waith yn Llyfr y Psalmau (' Alawydd ') a Llyfr Tonau ac Emynau (Stephen). Bu farw Chwefror 1871 a chladdwyd ef ym mynwent Glanadda, Bangor.

Awdur

• Robert David Griffith, (1877 - 1958)

Ffynonellau

• W. Parry, Llyfr Hanes Llenyddiaeth ac Enwogion Llanllechid a Llandegai (1921)
• Y Cerddor Cymreig (1861-1873), Mawrth 1871
• Y Cerddor, Gorffennaf 1893

Dolenni Ychwanegol

• VIAF: 162144647691021874759
• Wikidata: Q20804761

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/