ROBERTS, THOMAS (bu farw c. 1775), Bedyddiwr cyntaf ym Môn

Y Myfyrian Uchaf oedd ei gartref cyntaf, ond yn Nhrehwfa Fawr gerllaw Rhos-trehwfa ym mhlwyf Cerrig Ceinwen y gorffennodd ei oes. Codwyd ef yn Annibynnwr yn Rhosymeirch, ac yr oedd yn bregethwr cynorthwyol yno, ond yn 1763 (1768 yn ôl Frimston), gyda chymeradwyaeth yr eglwys, fe'i cymhellwyd gan David Jones, Wrecsam, i ddod ato i'w fedyddio ganddo, a daeth yn aelod yno, er ei fod yn dal i fyw ym Môn. Bu farw tua 1775, heb weld bedyddio neb arall o'r sir, ac fe'i claddwyd yn Rhosymeirch. Y mae Spinther yn priodoli iddo lyfryn o'r enw Traethawd am Enaid ac Yspryd yn ôl yr Ysgrythyr a gyhoeddwyd yn 1785.

Awdur

• Benjamin George Owens

Ffynonellau

• Archifau LlGC: NLW MS 7123B: Hanes Eglwys y Bedyddwyr yn Sir Fôn
• Hanes y Bedyddwyr ymhlith y Cymry: o amser yr Apostolion, hyd y flwyddyn hon: yn ddwy ran (Caerfyrddin 1778), 592
• Hanes y Bedyddwyr yn Nghymru, iii, 203
• Frimston, Ebenezer Sef Hanes Eglwys Fedyddiedig Llangefni, o'i chychwyniad yn 1779 hyd 1897 (118 mlynedd), yn nghyda hanes ei gweinidogion, a'i chymanfaoedd, 9

Dolenni Ychwanegol

• Wikidata: Q20804800

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/