ROBERTS, WILLIAM (1828 - 1872), athro yng Ngholeg yr Annibynwyr yn Aberhonddu

Ganwyd 1 Gorffennaf 1828 yn Nowlais, yn fab i Daniel Roberts, gweinidog eglwys Annibynnol Bryn Seion (Hanes Eglwysi Annibynnol Cymru, ii, 280-1). Aeth i ysgol Ffrwd-y-fâl, ac oddi yno (1845) i Coward College yn Llundain; ond symudodd oddi yno bron ar unwaith i Goleg Caerfyrddin. Cafodd ysgoloriaeth y Dr. Williams yn 1850, ac aeth i Glasgow, lle y bu am dair blynedd, gan ennill medal mewn Lladin; ond torrodd ei iechyd ac ymadawodd heb radd. Yr oedd o duedd bruddglwyfus, ac ni hoffai bregethu - nid ystyrid mohono chwaith yn bregethwr. Felly, wedi bwrw peth amser fel athro mewn ysgolion yn Lloegr, agorodd ysgol ramadeg yng Nghaerdydd. Yn 1856, ar farw'r athro Edward Davies, etholwyd ef yn athro ieithoedd yn Aberhonddu. Bu'n gyd-olygydd i'r Y Beirniad o 1859 hyd 1872. Torrodd ei feddwl i lawr yn 1872, a bu farw yn Malvern 9 Mawrth 1872.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Y Beiriniad: cyhoeddiad trimisol, er egluro gwyddoriaeth, gwladyddiaeth, llenyddiaeth a chrefydd, 1874
• Album Aberhonddu … o'r flwyddyn 1755 hyd 1880 (1898)
• E. Pan Jones, Oriel Coleg Presbyteraidd, Caerfyrddin: yn cynwys hanes yr holl fyfyrwyr fu yn y coleg o 1796 hyd 1899 (Merthyr Tydfil 1909)

Dolenni Ychwanegol

• Wikidata: Q20751837

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/