SAMUEL, WILLIAM THOMAS (1852 - 1917), cerddor

Ganwyd 17 Hydref 1852 yng Nghaerfyrddin. Derbyniodd ei addysg yn ysgol elfennol Caerfyrddin ac wedi hynny cafodd gwrs o addysg gan y Parch. Lewis Lewis, a chan Alcwyn Evans. Dechreuodd ddysgu nodiant y Tonic Sol-ffa yn ieuanc, a chafodd amryw dystysgrifau. Yn 17 oed cadwai ddosbarth i ddysgu Tonic Sol-ffa yng Nghaerfyrddin, Felin Wen, ac Abergwili. Yn 1869 dewiswyd ef yn arweinydd côr undebol Caerfyrddin. Enillodd holl dystysgrifau Coleg y Tonic Sol-ffa, a chafodd y radd o L.T.S.C. a gwnaed ef yn aelod o gyngor y coleg. Bu am gyfnod yng Ngholeg Aberystwyth o dan addysg Dr. Joseph Parry.

Cyfansoddodd nifer o donau, anthemau, a darnau cerddorol. Bu ' Storm the Fort of Sin,' ei anthemau ' Mor hawddgar yw Dy bebyll ' ac ' O'r dyfnder y llefais,' a'i bedwarawd, ' Y Deigryn,' yn boblogaidd. Cydolygodd Llawlyfr Moliant y Bedyddwyr, ac efe a drodd i'r Sol-ffa gasgliad o donau ' Elis Wyn o Wyrfai.' Bu'n byw yn Tŷ Du, sir Fynwy, Abertawe, a Chaerdydd. Arweiniodd lawer o gymanfaoedd canu.

Yng ngŵyl y plant a gynhaliwyd yn Neuadd y Parc, Caerdydd, 23 Chwefror 1917, arweiniai dros 500 o blant i ganu ' Ymdeithio'r ym tua Seion,' ac wedi canu eisteddodd ar y llwyfan a bu farw. Claddwyd ef ym mynwent gyhoeddus Aberystwyth, 28 Chwefror 1917.

Awdur

• Robert David Griffith, (1877 - 1958)

Ffynonellau

• Mr W. T. Samuel, Caerdydd, Y Cerddor, Tachwedd 1899, t.122
• Y Cerddor, Ebrill 1917

Darllen Pellach

• J. Ifano Jones, Bywyd a llafur W.T. Samuel (Llanuwchllyn 1920)
• Erthygl Wicipedia: William Thomas Samuel

Dolenni Ychwanegol

• Archifau LlGC: NLW MS 19377C: Diary with MS notes, of William Thomas Samuel (1852-1917), musician; papers of Eddie Williams, pioneer of school milk and meals
• VIAF: 61257845
• Wikidata: Q20734709

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/