SAUNDERS, THOMAS (1732 - 1790), gweinidog gyda'r Annibynwyr

Ganwyd yn 1732; ni wyddys ddim am ei ddechreuadau, ond gellid meddwl mai gŵr o Bontypŵl ydoedd - hyd yn oed pan oedd yn weinidog urddedig, daliodd i fyw ym Mhont-y-moel ac i weithredu fel goruchwyliwr yng ngwaith haearn Hanbury. I bob golwg, un o ddychweledigion y diwygiad Methodistaidd oedd Saunders; ' Methodistaidd ' oedd ei ddull o bregethu; a chyhudda Philip David ef o ' preaching like the Methodists, observing no order, but rambling,' ac o wahodd lled- Fethodistiaid eraill ' to give a rant ' yn ei gapel yng Nghasnewydd (Cofiadur, 1935, 37); ar y llaw arall, wrth gwrs, rhydd Edmund Jones (Trevecka Letter 2724) ganmoliaeth uchel iddo. Urddwyd ef, ddiwedd 1769, yn weinidog Llanfaches a'i changen yn Heol-y-felin, Casnewydd; yr oedd ganddo hefyd gynulleidfa ym Machen. Bu farw 9 Ionawr 1790, 'yn 58 oed,' a chladdwyd wrth gapel Heol-y-felin.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Hanes Eglwysi Annibynnol Cymru, i, 56, 60
• a'r cyfeiriadau eraill uchod

Dolenni Ychwanegol

• Wikidata: Q20734528

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/