THOMAS, PHILIP EDWARD (1878 - 1917), bardd, traethodwr, a beirniad

Ganwyd yn Lambeth, Llundain, 3 Mawrth 1878, mab Philip Henry Thomas, Tredegar, a'i wraig Mary Elizabeth, o Gasnewydd-ar-Wysg. O ran ei dras yr oedd o Forgannwg a Gwent, ac yr oedd y cefndir teuluol yn Gymreig. Cyhoeddwyd ei lyfr cyntaf, The Woodland Life, yn 1897. Yn 1899, ac yntau'n fyfyriwr yn Rhydychen, priododd Helen Berenice Noble; bu iddynt dri o blant. Yr oedd yn feirniad llenyddol nodedig, ac ymysg y beirniaid cyntaf i ganfod gallu W. H. Davies fel bardd. Ymysg ei gyfeillion o Gymry yr oedd W. H. Davies a John Jenkins ('Gwili'). Datguddir ei gariad dwfn at Gymru yn ei Beautiful Wales, 1905, ac yma a thraw, ar wasgar, yn ei weithiau eraill. Ysgrifennodd lawer o lyfrau mewn rhyddiaith gain a detholedig, eithr ni welwyd mo'i werth yn gyfan gwbl hyd nes y cyhoeddwyd, ar ôl ei farw, y caneuon a ysgrifennodd yn ei flynyddoedd diwethaf. Lladdwyd ef ar faes y frwydr, 9 Ebrill 1917. Heblaw y llyfrau a enwyd eisoes dylid ychwanegu: George Borrow, Richard Jefferies, Collected Poems, The Childhood of Edward Thomas, The Prose of Edward Thomas (a ddetholwyd gan Roland Gant).

Awdur

• Lawrence William Hockey

Ffynonellau

• Oxford Dictionary of National Biography
• Philip Edward Thomas, The Childhood of Edward Thomas A Fragment of Autobiography (London 1938)
• Helen Thomas, As it Was, a World without End (London 1935)
• R. P. Eckert, Edward Thomas: a biography and a bibliography (London 1937)
• James Guthrie, To the Memory of Edward Thomas (Bognor Regis 1937)
• John Moore, The Life and Letters of Edward Thomas (Llundain 1939)
• erthyglau yn The Welsh Review, Medi 1945 a'r haf 1948
• E. Cefni Jones, Gwili: cofiant a phregethau (Llandysul 1937)

Darllen Pellach

• Erthygl Wicipedia: Edward Thomas

Gweithiau

• Archifau LlGC: NLW MS 24122B: Edward Thomas poetry manuscript 1914-[1915]
• Archifau LlGC: NLW MS 24030i & iiA: Edward Thomas: War Diary, 1917

Dolenni Ychwanegol

• VIAF: 19686045
• Wikidata: Q1293865

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/