THOMAS, JOHN ('Eos Gwynedd '; 1742 - 1818), bardd

Ganwyd yn Bwlchmaenmelyn, amaethdy ym mhlwyf Cerrigydrudion, sir Ddinbych. Priododd ferch y Cernioge Mawr yn 1765. Ymsefydlodd ym Mhentrefoelas gan gadw masnachdy ac amaethu. Bu ymryson prydyddu rhyngddo a Thomas Edwards ('Twm o'r Nant') ynglŷn â chwestiwn bedydd. Yn 1817 cyhoeddodd Annerch Plant a Rhieni oddi ar farwolaeth William Thomas mab Lewis Thomas, Llanrwst; yn 1845 cyhoeddwyd casgliad o'i waith o dan y teitl Eos Gwynedd dan olygiaeth William Williams ('Gwilym Caledfryn'). Cyfansoddodd emynau, e.e. ' Pwy welaf fel f'anwylyd, yn hyfryd ac yn hardd,' a charolau. Bu farw 12 Medi 1818.

Awdur

• Robert (Bob) Owen, (1885 - 1962)

Ffynonellau

• Cofrestri plwyf Cerrigydrudion
• John Thomas, William Williams (gol.), Eos Gwynedd: sef casgliad o ganiadau ar destynau crefyddol, moesol, a difyrol (Llanrwst 1845)

Dolenni Ychwanegol

• Archifau LlGC: Mân Adnau 1295: Llawysgrif o farddoniaeth John Thomas, Pentrefoelas, 'Eos Gwynedd'
• Wikidata: Q28361476

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/