WILLIAMS, Syr CHARLES HANBURY (1708 - 1759), ysgrifennwr dychangerddi a llysgennad

Ganwyd 8 Rhagfyr 1708, pedwerydd mab y milwriad Major John Hanbury, Pont-y-pŵl. Cafodd ei addysg yng Ngholeg Eton. Yr oedd yn fab-bedydd i Charles Williams, Caerlleon-ar-Wysg; etifeddodd ganddo ef stad Coldbrook a thiroedd eraill, a swm mawr o arian; a mabwysiadodd y cyfenw ychwanegol Williams. Priododd 1 Gorffennaf 1732 â Frances, merch iarll Coningsbury. Ysgrifennodd Charles Hanbury Williams lawer o farddoniaeth yn llawn o watwareg; dywedai Horace Walpole ei fod ef yn credu mai Hanbury Williams oedd bardd mwyaf y genhedlaeth honno. Yn 1746 dechreuodd ar y gyfres o deithiau llysgenhadol y cofir ef yn bennaf o'u plegid. Dechreuodd ei feddwl ddrysu yn 1759 a bu farw 2 Tachwedd y flwyddyn honno, o bosibl trwy ei weithred ef ei hun; claddwyd ef yn abaty Westminster. Ar hynny aeth stad Coldbrook i'w frawd George Hanbury a fabwysiadodd, yntau hefyd, y cyfenw Williams.

Awdur

• Yr Athro Emeritus David Williams, (1900 - 1978)

Ffynonellau

• Oxford Dictionary of National Biography am ei weithiau dychanol a'i deithiau fel llysgennad
• G. S. H. Fox–Strangways (Iarll Ilchester) a Mrs. Langford Brooke, The Life of Sir Charles Hanbury Williams, poet, wit and diplomatist (1928), 1928
• D. B. Horn, Sir Charles Hanbury Williams and European Diplomacy, 1747-58 (Llundain 1930), 1930
• y mae bron y cwbl o bapurau swyddogol Williams fel gweinidog Prydeinig, ynghyd â'r dyddiadur preifat a gadwai pan oedd yn Berlin, a phapurau eraill, yn llyfrgell rydd Casnewydd-ar-Wysg, sir Fynwy

Dolenni Ychwanegol

• VIAF: 27937060
• Wikidata: Q332981

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/