WILLIAMS, JOHN (fl. 1739-79, cynghorwr Methodistaidd ac emynydd

Sonia Howel Harris am 'dear Jack of Errwd ' yn 1739; trigai teulu o'r cyfenw yn Erwd, plwyf Cerrig Cadarn, sir Frycheiniog. Yr oedd ef a William, ei frawd, yn gynghorwyr yn 1742-3, a chynhelid seiat Fethodistaidd yn eu cartref. Priododd William (bu farw 1746) ag Anne Bowen o'r Tyddyn. Priododd Sarah, ei chwaer, â Thomas James y cynghorwr o Lanfair-ym-Muellt. Gwasnaethai Howel Harris dad bedydd i blentyn John Williams yn 1748. Trwy ddylanwad Thomas James cefnodd teulu Erwd ar blaid Harris yn 1750, a cheir hwy ymhlith plaid annibynnol Thomas Bowen yn 1751. Credir mai ef yw awdur y casgliad bychan o emynau a gyhoeddwyd yn Aberhonddu yn 1779, Ychydig Hymnau: O waith John Williams, o Sir Frecheiniog. Pedwar emyn digon tila sydd yn y casgliad. Claddwyd gŵr o'r enw yng Ngherrig Cadarn 28 Gorffennaf 1779, ac un arall 22 Rhagfyr 1783. Cyhoeddwyd casgliad o'i emynau, Hymnau o Fawl i Dduw a'r Oen, etc., gan Wasg Trefeca yn 1805.

Awdur

• Y Parchedig Gomer Morgan Roberts, (1904 - 1993)

Ffynonellau

• Cylchgrawn Cymdeithas Hanes y Methodistiaid Calfinaidd, xxvii, 100; xxviii, 123; xxxi, 116; xxxiv, 31, 34, 75
• R. Bennett, Methodistiaeth Trefaldwyn Uchaf, 1738–1852 (1929), iii, 182, 187
• cofrestr Cerrig Cadarn
• Charles Ashton, Llyfryddiaeth Gymreig o 1801 i 1810 (1908), 109

Dolenni Ychwanegol

• Wikidata: Q20821181

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/