WILLIAMS, WILLIAM PRICHARD (1848 - 1916),

mab David Williams, ganwyd c.1824 Glasdo, Llan Ffestiniog, (un o ddisgynyddion William Prichard, Clwchdyrnog, sir Fôn), a'i wraig Ann Owen (c.1823-1867). Ganwyd 21 Gorffennaf 1848. Bu am ysbaid mewn ysgol yn y pentref a gedwid gan hen wraig, yna aeth i Fanceinion i wasanaeth J. a N. Phillips, a bu'n trafaelio drostynt hwy yng Ngogledd Cymru hyd derfyn ei oes. Ef oedd un o sylfaenwyr eglwys Bresbyteraidd Princes Road, Bangor, a dewiswyd ef yn un o'i blaenoriaid cyntaf. Yr oedd yn wir ysgolhaig, ac yn 1908, ar gais Urdd Graddedigion Prifysgol Cymru, golygodd argraffiad o Deffyniad Ffydd Eglwys Loegr, Maurice Kyffin. Bu'n briod ddwywaith: (1) ag Emily (bu farw 17 Medi 1881), a (2) â'i chwaer hi, Annie Ada (bu farw 26 Chwefror 1925) - merched i Henry Lloyd Jones, cyfreithiwr ym Mangor (J. E. Griffith, Pedigrees, 154). Bu farw 31 Gorffennaf 1916.

Awdur

• Yr Athro Emeritus Thomas Hudson-Williams, (1873)

Ffynonellau

• J. E. Griffith, Pedigrees of Anglesey and Carnarvonshire Families (1914), 154, 246
• gwybodaeth bersonol

Dolenni Ychwanegol

• Wikidata: Q20821244

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/