WILLIAMS, RICHARD (1747 - 1811), clerigwr a llenor

Ganwyd ym Mhenarlâg yn 1747 yn fab i'r rheithor, Richard Williams (M.A., Coleg Iesu, Rhydychen), a oedd yn fab i Peter Williams, clerigwr yntau, perchennog y Fron (Arddynwynt) gerllaw'r Wyddgrug - hawliai'r teulu dras Cynwrig Efell (Yorke, Royal Tribes of Wales). Yn Rhagfyr 1765, 'yn 18 oed,' aeth i Goleg Brasenose, Rhydychen, ond nid oes gofnod iddo raddio. Bu'n rheithor Machynlleth, 1789-1805, a Llanferres 1805-11; bu farw'n ddisyfyd 4 Mehefin 1811. Gradd neu beidio, y mae'n amlwg fod anian ysgolhaig ynddo; trosodd un o drasiedïau Seneca, y Medea, yn Saesneg, a gadawodd mewn llawysgrif drosiadau Lladin o farddoniaeth Gray, a phethau eraill. Ond cofir ef yn bennaf fel cyfaill Thomas Pennant, a chyfieithydd y darnau o farddoniaeth Gymraeg sydd yn Tour Pennant (megis ' Hirlas ' Owain Cyfeiliog); ymddengys cyfieithiadau ganddo hefyd yn Musical and Poetical Relicks, Edward Jones ('Bardd y Brenin').

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Foster, Alumni Oxonienses: the members of the University of Oxford
• The Cambro-Briton, i, 263
• H. B. Thomas, A History of the Diocese of St. Asaph (1874), ii, 403 (a 393 ar y tad)

Dolenni Ychwanegol

• Wikidata: Q20748870

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/