PROSSER, DAVID LEWIS (1868 - 1950), archesgob

Ganwyd 10 Mehefin 1868, mab David Prosser, o'r Tŷ Gwyn, Llangynnwr, ger Caerfyrddin, ac Elizabeth ei wraig. Cafodd ei addysg yn ysgol Llanymddyfri a choleg Keble, Rhydychen, lle y graddiodd gydag anrhydedd yn y trydydd dosbarth mewn Hanes; cymerodd ei B.A. yn 1891 a'i M.A. yn 1895. Ordeiniwyd ef yn ddiacon, 18 Rhagfyr 1892, gan yr esgob Basil Jones o Dyddewi, a'i drwyddedu i guradaeth eglwys y Drindod Sanctaidd, Aberystwyth. Cafodd urddau offeiriad gan John Lloyd, esgob (cynorthwyol) Abertawe, 21 Rhagfyr 1893. Yn 1896 aeth yn gurad i Eglwys Crist, Abertawe, a bu yno hyd ei godi yn 1909 yn ficer Doc Penfro. Penodwyd ef yn archddiacon Tyddewi yn 1920, a chysegrwyd ef yn esgob Tyddewi, i ddilyn John Owen, 2 Chwefror 1927. Yn 1944 dewiswyd ef yn archesgob Cymru i olynu C. A. H. Green a daliodd y swydd honno hyd 1949. Bu farw 28 Chwefror 1950, yn Abergwili, ac yno claddwyd ef.

Ysgrifennodd rai llyfrynnau defosiynol, ac yn 1949 derbyniodd radd LL.D. er anrhydedd gan Brifysgol Cymru.

Awdur

• Thomas Iorwerth Ellis, (1899 - 1970)

Ffynonellau

• Crockford's Clerical Directory, 1949-50
• Who's who?
• Cofrestri esgobol Tyddewi yn Ll.G.C.
• gwybodaeth bersonol

Darllen Pellach

• Erthygl Wicipedia: David Prosser

Dolenni Ychwanegol

• Wikidata: Q1175228

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/