JONES, HUGH ('Huw Myfyr '; 1845 - 1891), gweinidog gyda'r Methodistiaid Calfinaidd a bardd

mab Evan ac Elinor Jones o Lanfihangel Glyn Myfyr, sir Ddinbych. Bu'n brentis i feddyg yng Ngherrig-y-drudion, ond penderfynodd ymbaratoi ar gyfer y weinidogaeth, ac aeth i goleg y Methodistiaid Calfinaidd yn y Bala yn 1867. Yn 1871 cafodd alwad i nifer o eglwysi yn ac yn agos i Lanrhaeadr-ym-Mochnant (ordeiniwyd ef yn 1873), ac yno y priododd Margaret Lewis. Symudodd yn 1878 i Lanllechid, Sir Gaernarfon, ac oddi yno yn 1890 i Ddinorwig. Ystormus fu ei weinidogaeth yno, oherwydd, er ei fod yn ŵr galluog, yr oedd o dymer anwadal. Bu farw yn sydyn 9 Rhagfyr 1891, yn 46 oed. Ymddangosodd bywgraffiad ohono (gan David Williams), gyda detholiad o'i bregethau, yn 1893. Yr oedd yn fardd o beth bri. Cyhoeddodd sallwyr mydryddol, Salmydd y Cyssegr, yn 1885, a chyfrifid nifer o'i farwnadau, yn enwedig y rhai i'w athrawon, y Dr. Lewis Edwards a'r Dr. John Parry, yn rhai da.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Cymru (O.M.E.), ii, 129-32
• W. Hobley, Hanes Methodistiaeth Arfon, iv, 95-7
• J. Thickens, Emynau a'u Hawduriaid (1945)
• Owen Williams, Awduron Sir Ddinbych a'u gweithiau (1937), 74
• T. R. Roberts, Eminent Welshmen: a short biographical dictionary of Welshmen... from the earliest times to the present (1908)

Dolenni Ychwanegol

• Wikidata: Q20821148

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/