POWELL, PHILIP (1594 - 1646), Mynach o Urdd Sant Benedict, a merthyr

ganwyd yn y Trallwng (Trallwng Cynfyn?), Sir Frycheiniog, 2 Chwefror 1594, mab Roger ap Rosser Powell, a Catherine Morgan. Danfonwyd ef i ysgol ramadeg Y Fenni, lle y cymeradwywyd ef gan y prifathro, Morgan Lewis (tad y Tad David Lewis, S.J. i'r Dom David Augustine Baker, O.S.B., gan ddywedyd ' O Saint o Vaighgen y'e '. Arolygodd yr olaf hwn ei astudiaethau yn y gyfraith o 1610 hyd 1614, a'i ddanfon yna i Fflandrys lle y bu'n astudio ar draul y Tad Baker ym Mhrifysgol Louvain, 1614-19. Ordeiniwyd ef yn offeiriad yn 1618, a chymerth abid mynach ar 15 Awst 1619, wedi iddo efrydu tan y Dom Leander Jones, O.S.B.. Wedyn fe'i apwyntiwyd yn gellor (Cellerarius) Mynachlog Sant Gregori, Douai, a danfonwyd ef i'r maes cenhadol Seisnig ar 7 Mawrth 1622. Bu'n byw gyda'r Dom Baker am 16 mis yn Gray's Inn, Llundain. Yn ystod yr 20 mlynedd nesaf bu'n gaplan i wahanol deuluoedd yn siroedd Dyfnaint a Gwlad-yr-Haf, hyd ddechrau'r Rhyfel Cartref. Wedi gwasanaethu fel caplan i'r milwyr brenhinol, ceis iodd anelu at Sir Fynwy, yn 1646, ond fe'i daliwyd ger y Mamwyl (Mumbles) ar 22 Chwefror 1646, gan y Capten Crowther a'i cadwodd yn garcharor am ddau fis ar ei long ar forffyrdd Penarth cyn ei ddanfon ar y môr i Lundain. 16 Mehefin fe'i condemniwyd, ar ôl prawf yn Neuadd Westminster, am fod yn offeiriad, ac fe'i dienyddiwyd yn Tyburn, 30 Mehefin 1646. Cedwir ei groes yn abaty Downside, lle y ceir hefyd beth o'i wallt. Y mae eraill o'i greiriau ym meddiant y Lleiananod Benedictaidd yn Colwich, sir Stafford.

Awdur

• John Martin Cleary

Ffynonellau

• Dom. Bede Camm, Nine Martyr Monks. The lives of the English Benedictine martyrs beatified in 1929 (1931), 318-43
• The Downside Review, XLVIII
• Rev. F. E. Llewellyn Jones, The Blessed Philip Powell
• Catholic Record Society XXXIII, 99
• T. P. Ellis, The Welsh Benedictines of the terror (Drenewydd 1936), 166-79,
• Joseph Gillow, A Literary and Biographical History or Biographical Dictionary of the English Catholics (c.1895–1902)
• Challoner, Memoirs of Missionary Priests, … and of other Catholics, … that have suffered death in England, on religious accounts, from … 1577 to 1684

Darllen Pellach

• Erthygl Wicipedia: Philip Powell

Dolenni Ychwanegol

• Wikidata: Q7184229

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/