DAVIES, JOHN GWYNORO (1855 - 1935), gweinidog gyda'r Methodistiaid Calfinaidd

Ganwyd 28 Chwefror 1855 yn Llanpumpsaint, mab y Parch. Evan Davies. Cafodd ei addysg yn ysgol y pentref, daeth yn ddisgybl-athro, ac, yn 20 oed, yn brifathro ysgol y Dinas, Rhondda. Cymerai ddiddordeb arbennig mewn dysgu cerddoriaeth yn yr ysgolion.

Penderfynodd fynd i weinidogaeth y Methodistiaid Calfinaidd ac aeth i Goleg y Brifysgol, Aberystwyth, yn 1877, cyn mynd i Goleg y Bala. Cyd-letyai yn Aberystwyth â (Syr) Owen M. Edwards, a i cyflwynodd ef i T. E. Ellis ac a'i cynorthwyodd i gael ei fugeiliaeth gyntaf - yn Llanuwchllyn. Yn 1887 symudodd i fugeilio eglwys Caersalem, Abermaw, lle y bu hyd ei farw, 23 Mawrth 1935.

Yr oedd Gwynoro yn Rhyddfrydwr radicalaidd pybyr ac yn Gymro gwladgarol; yr oedd ei ddiddordeb yn fwy mewn materion cyhoeddus, yn enwedig materion addysgol, nag mewn crefydd enwadol. Bu'n gadeirydd cyngor dinesig Abermaw am 17 mlynedd, ac yr oedd yn aelod o bron bob pwyllgor cyhoeddus yng Nghymru. Ysgrifennodd lawer o erthyglau i'r Gwyddoniadur Cymreig, a chyhoeddodd Flashes from the Welsh pulpit, cyfrol yr ysgrifennodd Thomas Charles Edwards ragymadrodd iddi. Priododd (1) Mary, merch John Jones ('Ivon'), a (2), Jeannie Mary, merch William Watkin, Muriau, Cricieth.

Awdur

• William Watkin Davies

Ffynonellau

• Adnabyddiaeth bersonol

Gweithiau

• John Gwynoro Davies, Er cof: bywgraffiad o'r diweddar Barch. Lewis Edwards, D.D., Prifathraw Coleg y Methodistiaid Calfinaidd, Bala (Bala 1887)
• John Gwynoro Davies, In memoriam: a short biographical sketch of the life of the late Rev. Lewis Edwards, D.D., Principal of the C.M. College, Bala (1887?)

Dolenni Ychwanegol

• VIAF: 103038416
• Wikidata: Q20733430

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/