DAVIES, HUMPHREY (neu WMFFRE DAFIS (bu farw 1635), ficer Darywain, a chopïydd llawysgrifau Cymraeg

Mab Dafydd ap Gruffudd o gyffiniau Harlech. Dywedir iddo fod yn rheithor Llanfyllin am rai misoedd yn 1571, ac iddo fyned oddi yno i astudio yng Nghaergrawnt. Ymddengys i'w yrfa yno gael ei chymysgu ag eiddo gwr o'r un enw o Leamington Hastings yn y llyfrau ar raddedigion Caergrawnt. A barnu oddi wrth ddistawrwydd y beirdd ar y pwnc, ni chymerth radd yno. Bu'n ficer Darywain o 1577 hyd ei farw yn 1635. Copïodd nifer o lawysgrifau barddoniaeth Gymraeg, ac erys o leiaf chwech ohonynt, sef Gwyneddon 1, Llanstephan 35 a 118, Mostyn 160, Bodewryd MS 1D , a Brogyntyn 2. Copïodd yr olaf hwn i'r Dr. Theodore Price, is-ddeon Westminster, a nai i'w wraig, Sioned ferch Edward Stanley, cwnstabl castell Harlech yn 1551. Canwyd cywyddau iddo gan Ruffudd, Richard, a Sion Philip, Ieuan Tew Brydydd o Arwystl, ac Evan Lloyd o Waun Einion. Dywed Richard a Sion Philip iddo yn ieuanc gyfieithu llyfrau estron i'r Gymraeg.

Awdur

• Evan David Jones, (1903 - 1987)

Ffynonellau

• A Survey of the Cathedral-Church of St. Asaph (1720), i, 384
• H. B. Thomas, A History of the Diocese of St. Asaph (1874), ii, 234
• Athenae Cantabrigienses (1858–1913), ii, 474
• Alumni Cantabrigienses
• N.L.W. Church in Wales Rec., St Asaph
• Reg. Collat.

Gweithiau

• Archifau LlGC: Brogyntyn MS I.2: Barddoniaeth, 1599

Dolenni Ychwanegol

• Wikidata: Q20733212

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/