DAVIES, JENKIN (1798 - 1842), gweinidog gyda'r Methodistiaid Calfinaidd

Ganwyd yn Tirgwyn gerllaw Pensarn, Ceredigion, 24 Mehefin 1798, yn fab i Evan Davies, cynghorwr a oedd yn un o gefnogwyr cryfaf ordeiniad 1811. Bu mewn ysgolion yn Llwyn Dafydd, Aberteifi, a'r Ceinewydd, a chymerodd fferm Synod Uchaf. Dechreuodd bregethu yn 1825, y flwyddyn y bu farw ei dad ysbrydol Ebenezer Morris, a syrthiodd arolygiaeth seiadau cylch Twrgwyn i bob pwrpas ar ei ysgwyddau ef. Yn 1833 fe'i hordeiniwyd (yn Aberteifi); ymadawodd âi fferm ac aeth i fyw i Faelon Uchaf yn ymyl Twrgwyn - hynny yw, efe oedd bugail Twrgwyn, er nad oedd gan y Methodistiaid Calfinaidd 'fugeiliaeth' swyddogol yn y cyfnod hwnnw. Ni rydd y cofnod main hwn o'i yrfa syniad o bwysigrwydd Jenkin Davies yn hanes Methodistiaeth gwaelod Ceredigion; yr oedd yn bregethwr nodedig, a derbyniol ym mhob rhan o Gymru ac yn Llundain, ac yr oedd gan wŷr fel Henry Rees a Lewis Edwards feddwl neilltuol uchel ohono. Bu farw 10 Awst 1842. Y mae Cofiant byr iddo, gan Abel Green a J. Hugh Jones (Castellnewydd Emlyn, 1845). Yr oedd yn briod, a chanddo deulu.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), i, 126

Darllen Pellach

• Abel Green, J. Hugh Jones, Cofiant, yn cynwys ychydig o hanes bywyd y diweddar Barchedig Jenkin Davies, Tŵrgwyn, yn Swydd Ceredigion; ynghyd â rhai o'i bregethau, &c. hefyd, ychydig o hanes ei rieni (Castellnewydd Emlyn 1845)
• David Samuel, Mr David Jenkin Davies (Caernarfon 1893)

Dolenni Ychwanegol

• VIAF: 149349078
• Wikidata: Q20733339

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/