DAVIES, JOHN (1750 - 1821), offeiriad Methodistaidd

Ganwyd tua 1750, mab Henry Davies, curad Penarth (bu farw 1723), ac ŵyr i John Davies, curad Llanddarog a Llanarthnau, 1719 hyd 1762 (yr oedd ef yn gyfeillgar â Howel Harris, a cheir llythyrau o'i eiddo yn Welch Piety). Ordeiniwyd John Davies gan esgob Tyddewi yn ddiacon, 1773, ac yn offeiriad, 1774; bu'n gurad Abernant a Chynwyl Elfed o 1775 hyd 1787. [Yn ôl yr Evang. Mag., 1826, (cofiant Griffith Williams, tt. 457-61) yr oedd yn gurad Cynwyl yn 1774.] Ymunodd wedyn â'r Methodistiaid a bu'n pregethu yn eu plith dros Gymru oll. Codwyd capel Bancyfelin iddo yn 1788 a bu'n gweinyddu'r Cymun yno hyd 1811. Dywedir iddo gefnu ar y Methodistiaid y pryd hynny, ond tystiolaeth yr arysgrif ar ei feddfaen yn Llanddowror yw ei fod yn 'Minister of the Gospel at Bank-y-felin upwards of 36 years.' Canodd farwnad i goffadwriaeth David Jones, Llan-gan, yn 1811. Bu farw 24 Rhagfyr 1821. Ŵyr iddo (mab Frances, ei unig ferch), oedd John Thomas (1807 - 1870), cenhadwr yn Tinnevelly, India.

Awdur

• Y Parchedig Gomer Morgan Roberts, (1904 - 1993)

Ffynonellau

• Methodistiaeth Cymru (1851–6), ii, 476
• D. E. Jenkins, Life of Thomas Charles (Dinbych 1908), ii, 135; iii, 26, 327-8
• A. H. Grey-Edwards, The Life of a Great Missionary. Memoir of the Rev. John Thomas, C.M.S. missionary at Mengnanapuram … 1836-1870 … With a preface by … Bishop Royston, etc (Llundain 1904), 5-8
• Transactions of the Carmarthenshire Antiquarian Society and Field Club, xvi, 19
• James Morris, Hanes Methodistiaeth Sir Gaerfyrddin (1911), 191

Dolenni Ychwanegol

• Wikidata: Q20733367

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/