DAVIES, JOHN (1772 - 1855), cenhadwr ac athro ysgol

Bu'n genhadwr o dan Gymdeithas Genhadol Llundain yn Ynysoedd Môr y Deau am 54 mlynedd, ac athro ysgol o dan Thomas Charles o'r Bala yn Llanwyddelan yn 1800; ganwyd 11 Gorffennaf 1772 yn fferm fechan Pendugwm, ym mhlwyf Llanfihangel-yng-Ngwynfa, Sir Drefaldwyn. Mab i wehydd ydoedd, ac wedi bod am ychydig addysg yn ysgolion Madam Bevan, bu'n cadw ysgol ei hun yn Llanrhaeadr-ym-Mochnant. Ymaelododd gyda'r Methodistiaid a addolai mewn tŷ annedd o'r enw Penllys. Pan ofynnwyd am athrawon i ynys Tahiti, barnwyd ei fod yn gymwys i'r gwaith, a hwyliodd ef a'i briod tuag yno, 5 Mai 1800. Bu Elizabeth Davis yn ymweld ag ef yno.

Yr oedd o'r un ardal ag Ann Griffiths, cynhwyswyd ychydig dudalennau o'i waith yn y gyfrol Gwaith Ann Griffiths yng ' Nghyfres y Fil ', ac ysgrifennai'n fynych at John ei brawd, ac y mae llu o'i lythyrau at y Parch. John Hughes, Pont Robert, ar glawr.

Paratoes ramadeg a geiriadur o iaith Tahiti, trosodd Taith Pererin, cyfieithodd rannau helaeth o'r Testament Newydd a'r Salmau, catecism Brown, catecism Westminster ac amryw o lyfrau llai. Cyhoeddwyd ei History of the Tahitian Mission, 1799-1830, gol. C. W. Newbury (Caergrawnt, 1962).

Llafuriodd mewn dellni am y 10 mlynedd olaf o'i oes, a bu farw 19 Awst 1855 ar ôl tymor difwlch o 55 mlynedd dros y don.

Awdur

• Y Parchedig Ddr Evan Lewis Evans, (1898 - 1978)

Ffynonellau

• R. Williams, Montgomeryshire Worthies (1894), 40-1
• G. Penar Griffith, Cenhadon Cymreig, 129-33
• E. Lewis Evans, Cymru a'r Gymdeithas Genhadol, sef hanes ei Chychwyn (1945), 30, 36, 59, 181, 193

Darllen Pellach

• Erthygl Wicipedia: John Davies, Tahiti

Dolenni Ychwanegol

• VIAF: 39501896
• Wikidata: Q20733372

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/